मध्यप्रेदश राज्यातून एक धक्कादायक घटना समोर आली आहे. बापानेच आपल्या पोटच्या 15 वर्षीय मुलाचे दोन्ही हात तोडून त्याची निर्घृण हत्या केली. देवास जिल्ह्यातील बरोठा पोलीस ठाण्याच्या हद्दीत ही घटना घडली. वडिलांना एका महिलेसोबत आक्षेपार्ह अवस्थेत पाहिले होते. यावरूनच, दोन्ही हात कापून त्यानंतर गळा आवळून त्याचा खून केला. पोलिसांनी आरोपी वडील आणि महिलेला अटक केली आहे.

देवासचे एसपी शिवदयाल सिंह यांनी एका हिंदी वृत्तपत्राला दिलेल्या माहितीनुसार, बांगर्डा गावात 6 डिसेंबर रोजी एक मृतदेह आढळून आला. पोलिसांच्या पथकाला झुडपात एक विव्रस्त्र अवस्थेत मृतदेह सापडला. मृतदेहाचे दोन्ही हात कोपरापासून तोडण्यात आले होते. तपासादरम्यान एका दिवसापूर्वीच तरुणाची हत्या झाल्याचे निष्पन्न झाले. हरिओम चौहान (15) असे या मुलाचे नाव आहे. पोलिसांनी मुलाच्या वडीलांना ताब्यात घेऊन चौकशी केली असता, त्यांनी गुन्हा मान्य केला आहे.

हरिओम चौहान हा आठवीच्या वर्गात, गावातील सरकारी शाळेत शिकत होता. तो एकुलता एक मुलगा होता. त्याला एक बहीणही आहे. आरोपी वडील शेतकरी असून ते देखील मजुरी करायचे.