CBI: सीबीआयने नकली पासपोर्ट बनवण्याच्या रॅकेटचा पर्दाफाश केला असून याप्रकरणात अनेक अधिकाऱ्यांना ताब्यात घेतले आहे. मिळालेल्या माहीतीनुसार, गंगटोक आणि कोलकत्ता या ठिकाणी क्षेत्रीय पासपोर्ट ऑफीसमधून पासपोर्ट मिळण्याबाबतच्या तक्रारीनंतर सीबीआयने सिक्कीम आणि पश्चिम बंगालमध्ये ५० ठिकाणी तपास सुरु केला आहे.

मिळालेल्या माहीतीनुसार, या तपासादरम्यान गंगटोकच्या पासपोर्ट( PASSPORT ) ऑफीसमधून गौतम कुमार यांना लाचखोरीच्या प्रकरणात अटक केली आहे. त्यांना 1,90,000 रुपयांची लाच घेताना सीबीआयने रंगेहात पकडले आहे.

नकली पासपोर्ट बनवण्याच्या आरोपाखाली सरकारी अधिकारी आणि अन्य व्यक्ती मिळून २४ जणांविरुद्ध तक्रार दाखल करण्यात आली आहे.

अधिकाऱ्यांनी दिलेल्या माहीतीनुसार, १६ अधिकाऱ्यांसहित २४ असे लोक आहेत जे लाच घेऊन भारतीय नसलेल्या व्यक्तींना खोट्या कागदपत्रांच्या आधारे नकली पासपोर्ट बनवून देत होते. आता सीबीआय( CBI ) कोलकाता, सिलीगुड़ी, गंगटोक आणि आणखी काही ठिकाणी तपास करत आहे.

मिळालेल्या माहीतीनुसार, सरकारी अधिकाऱ्यांच्या मदतीने एक व्यक्ती अशा नेटवर्कचा भाग आहे जे नेटवर्क नकली पासपोर्ट बनवून देते. आता यामध्ये आणखी काही संशयित असल्याची माहीती अधिकाऱ्यांनी दिली आहे.