Ram Mandir: गेल्या काही तासांपासून अयोध्येतील श्री राम मंदिरातील मूर्तीचे फोटो व्हायरल होत आहेत. 22 जानेवारीला प्रभू श्रीरामांची प्राणप्रतिष्ठा होणार आहे. ही मूर्ती अद्याप उघडण्यात आलेली नाही. मात्र प्रभू रामाच्या मूर्तीचे डोळे उघडे असल्याचे फोटो सोशल मीडियावर व्हायरल होत आहे. यावरच आता, श्री रामजन्मभूमी तीर्थ क्षेत्राचे मुख्य पुजारी आचार्य सत्येंद्र दास यांनी आपली प्रतिक्रिया दिली आहे.

दास म्हणाले की, "...प्राणप्रतिष्ठा होण्यापूर्वी प्रभू रामाच्या मूर्तीचे डोळे उघड होऊ शकत नाहीत. ज्या मूर्तीमध्ये प्रभू रामाचे डोळे उघडे दिसतात ती खरी मूर्ती नाही. निवडलेल्या मूर्तीचे डोळे मिटलेले आहेत.”

श्री रामजन्मभूमी तीर्थ क्षेत्राचे मुख्य पुजारी आचार्य सत्येंद्र दास यांनी सांगितले की, मूर्तीची प्रतिष्ठापना झाली असून ती अद्याप उघडण्यात आलेली नाही. ते पुढे म्हणाले की, रामलल्लाची मूर्ती झाकण्यात आलेली आहे.

हा फोटो व्हायरल का झाला, याची चौकशी व्हायला हवी

दास पुढे म्हणाले की, ''असे फोटो व्हायरल होत असतील तर त्याची तात्काळ चौकशी करण्यात यावी. मूर्तीचे डोळे कोणी उघडले आणि हे फोटो कसे व्हायरल झाले याचा तपास करण्यात यावा.'' दरम्यान, प्रभू रामाचे 'बाल स्वरुप' दर्शवणारी ही मूर्ती, 1.5 टन वजनाची आणि म्हैसूर-स्थित कलाकार अरुण योगीराज यांनी डिझाइन केलेली आहे. विशेष म्हणजे, ही मूर्ती रामचरितमानस आणि वाल्मिकी रामायणात प्रभू रामाचे ज्या प्रकारे चित्रण केले आहे त्याप्रमाणे आहे.