Gujarat-Himachal Election: देशातील गुजरात आणि हिमाचल प्रदेश या राज्यांमध्ये निवडणुकीच्या तारखा जाहीर झाल्या आहेत. त्या पार्श्वभुमीवर दोन्ही राज्यात जोरदार रणधुमाळी सुरू झाली आहे. त्यातच आता दोन्ही राज्यांमध्ये मिळून मोठ्या प्रमाणात रोकड आणि मद्य जप्त करण्यात आल्याची माहिती निवडणूक आयोगाने दिली आहे.

हिमाचल प्रदेशात शनिवारी मतदान होणार आहे तर गुजरातमध्ये 1 आणि 5 डिसेंबर रोजी अशा दोन टप्प्यांमध्ये मतदान होत आहे. विशेष म्हणजे, 2017 च्या विधानसभा निवडणुकीच्या तुलनेत पाच पट अधिक रोकड आणि मद्य जप्त करण्यात आले आहे.

निवडणूक आयोगाने म्हटले आहे की, गुजरातमध्ये आचारसंहिता सुरू असताना गेल्या काही दिवसांच्या काळात 71.88 कोटी रूपये रोकड जप्त करण्यात आली आहे. 2017 च्या निवडणुकीत गुजरातमध्ये 27.21 कोटी रूपये जप्त करण्यात आले होते.

तर हिमाचल प्रदेशात आत्तापर्यंत 50.28 कोटी रूपयांची रोकड जप्त करण्यात आली आहे. 2017 च्या निवडणुकीत हिमाचल प्रदेशात 9.03 कोटी रूपयांची रोकड जप्त करण्यात आली होती. म्हणजेच हिमाचल प्रदेशात यंदा जप्त करण्यात आलेली रोकड ही गत निवडणुकीतील रकमेपेक्षा पाच पट अधिक आहे.