Uttar Pradesh Crime: उत्तर प्रदेशातील बदायूंमध्ये पत्नी आणि मुलीची निर्घृण हत्या केल्याचा आरोप असलेल्या एका व्यक्तीला पोलिसांनी अटक केली आहे. या दुहेरी हत्याकांडामुळे संपूर्ण परिसरात एकच खळबळ उडाली आहे.

पोलीस या प्रकरणाचा गांभीर्याने तपास करत आहेत. पोलीस गावातील लोकांचीही चौकशी करत आहेत. आरोपीच्या कुटुंबात नेमका कोणता वाद सुरु होता हे ही पोलीस जाणून घेण्याचा प्रयत्न करत आहेत.

काय आहे संपूर्ण प्रकरण?

दरम्यान, दुहेरी हत्याकांडाची ही हृदयद्रावक घटना बदायूंमधील दाता गंज पोलीस स्टेशन परिसरातील आहे. येथील भुदेली गावात एका व्यक्तीने पत्नी आणि निष्पाप मुलीची कुऱ्हाडीने वार करुन निर्घृण हत्या केली.

या घटनेने संपूर्ण गावात खळबळ उडाली. या घटनेनंतर नागरिकांकडून (Citizens) तीव्र संताप व्यक्त केला जात आहे.

दुसरीकडे, घटनेनंतर गावातील लोकांनी तात्काळ पोलिसांना माहिती दिली. त्यानंतर पोलिसांनी तात्काळ कारवाई करत आरोपीला ताब्यात घेतले.

पोलिसांनी (Police) दिलेल्या माहितीनुसार, अखिलेश यादव असे आरोपीचे नाव आहे. दिल्लीच्या खुशबूशी दोन वर्षांपूर्वी त्याने प्रेमविवाह केला होता. खूशबूने आठ महिन्यांपूर्वी एका गोंडस मुलीला जन्म दिला होता.

पती-पत्नीमध्ये वाद सुरु होता

पोलिसांनी दिलेल्या माहितीनुसार, पती-पत्नीमध्ये वाद सुरु होता. अटक केलेल्या व्यक्तीची चौकशी केल्यानंतर पोलिसांना दोघांमधील वादाचे कारण समजू शकेल.

नुकतेच एका मुद्द्यावरुन दोघांमध्ये कडाक्याचे भांडण झाले होते. बदायूंचे एसएसपी डॉ. ओ.पी. सिंग या प्रकरणाची वैयक्तिक चौकशी करत आहेत. त्यानुसार आरोपींवर पुढील कायदेशीर कारवाई सुरु आहे.