Delhi High Court: दिल्ली उच्च न्यायालयाने बुधवारी योगगुरु रामदेव बाबा यांना अ‍ॅलोपॅथी आणि कोरोना उपचारांवरुन फटकारले आहे. जनतेची दिशाभूल करु नका, असे न्यायालयाने म्हटले आहे. तुमचे अनुयायी, शिष्य आणि तुमच्यावर विश्वास ठेवणार्‍या लोकांचे स्वागत आहे. मात्र उथळपणाने बोलून कोणाचीही दिशाभूल करु नका, असे उच्च न्यायालयाने म्हटले आहे. योगगुरु रामदेव बाबा यांच्यावर कोरोना उपचाराबाबत चुकीच्या माहितीचा प्रसार केल्याचा आरोप आहे.

खरे तर, योगगुरु रामदेव बाबा (Yoga guru Ramdev Baba) यांनी कोरोना रुग्णांवर ज्या पध्दतीने डॉक्टरांनी उपचार केले त्यावरुन टीका केली होती. 2021 मध्ये व्हायरल झालेल्या एका व्हिडिओमध्ये, कोरोना (Corona) संसर्गावर उपचार करण्यासाठी वापरल्या जाणार्‍या काही औषधांवर बाबा रामदेवांनी प्रश्न उपस्थित केले होते. COVID-19 साठी अ‍ॅलोपॅथिक औषधे घेतल्यानंतर लाखो लोक मरण पावले, असे बाबा म्हणाले होते. त्यांच्या या वक्तव्यावरुन डॉक्टरांच्या संघटनांनी निषेध नोंदवला होता. त्याचवेळी दिल्ली मेडिकल असोसिएशनने दिल्ली उच्च न्यायालयात (Delhi High Court) याचिकाही दाखल केली होती.

'अ‍ॅलोपॅथीला आपली प्रतिष्ठा वाचवायची आहे'

दिल्ली मेडिकल असोसिएशनच्या याचिकेवर सुनावणी करताना न्यायमूर्ती भंबानी म्हणाले, "माझी चिंता आयुर्वेदाचे नाव आणि प्रतिष्ठा वाचवण्याची आहे. अ‍ॅलोपॅथीच्या विरोधात कोणाचीही दिशाभूल होऊ नये हा माझा उद्देश आहे.'' न्यायालयाने पुढे म्हटले की, 'मी लस घेणार नाही असे म्हणणे वेगळी गोष्ट आहे, परंतु लस विसरा असे म्हणणे चुकीचे आहे. कोरोना लस घेणे ही एक वेगळी गोष्ट आहे.'

आयएमएने माफी मागावी अशी मागणी केली होती

इंडियन मेडिकल असोसिएशनने (Indian Medical Association) रामदेव बाबा यांच्या अ‍ॅलोपॅथी आणि अ‍ॅलोपॅथिक डॉक्टरांविरुद्ध केलेल्या कथित वक्तव्याबद्दल त्यांना मानहानीची नोटीस बजावली होती. 15 दिवसांच्या आत त्यांनी माफी मागावी अशी मागणीही त्यांनी केली होती.