Dibrugarh bound IndiGo flight diverted to Guwahati: 'विमानाच्या इंजिनमध्ये बिघाड झाला' इंडिगोच्या विमानात वैमानिकाने असे सांगताच एकच खळबळ निर्माण झाली. त्यानंतर विमान गुवाहाटी येथील गोपीनाथ बोर्डोलोई इंटरनॅशनलच्या दिशेने वळवण्यात आले आणि त्याचे इमर्जन्सी लँडिंग करण्यात आले. आसाममधील गुवाहाटीहून दिब्रुगडला जाताना रविवारी सकाळी ही घटना घडली.

विमानात केंद्रीय पेट्रोलियम आणि नैसर्गिक वायू राज्यमंत्री रामेश्वर तेली आणि भाजपचे दोन आमदार प्रशांत फुकन आणि तेराश गोवाला यांच्यासह 150 हून अधिक प्रवासी होते. दरम्यान, विमानाचे यशस्वीरित्या इमर्जन्सी लँडिंग करण्यात आले आणि सर्व प्रवाशांना सुखरूप बाहेर काढण्यात आले. लँडिंग होताच विमानतळ प्रशासन विमानाची तपासणी करत आहेत.

मी भाजप आमदार प्रशांत फुकन आणि तेराश गोवाला यांच्यासोबत इंडिगोच्या फ्लाइटमध्ये होतो. गुवाहाटी विमानतळाकडे वळवण्याआधी विमान 15 ते 20 मिनिटे हवेतच राहिले. आम्ही सर्व सुरक्षित आहोत. अशी माहिती केंद्रीय राज्यमंत्री रामेश्वर तेली यांनी एका वृत्तसंस्थेला दिली आहे.

मिळालेल्या माहितीनुसार, फ्लाइट क्रमांक 6E2652 ने सकाळी 8.40 च्या सुमारास गुवाहाटीहून उड्डाण केले आणि 20 मिनिटांत पुन्हा विमानतळावर परतले. वैमानिकाने इंजिनमध्ये बिघाड झाल्याची माहिती दिली तेव्हा इंडिगोचे विमान गुवाहाटी विमानतळावरून दिब्रुगडला निघाले होते, असे सांगण्यात आले, त्यानंतर विमान गुवाहाटीच्या गोपीनाथ बोरदोलोई आंतरराष्ट्रीय विमानतळाकडे वळवण्यात आले.

विमानाचे इमर्जन्सी लँडिंग करण्याचे कारण तांत्रिक बिघाड असल्याचे सांगितले जात आहे. गुवाहाटी येथे उतरल्यानंतर लगेचच विमानातील सर्व प्रवाशांना डी-बोर्ड करण्यात आले आणि विमान तपासणीसाठी पाठवण्यात आले. मात्र, याप्रकरणी इंडिगोकडून अद्याप कोणतीही प्रतिक्रिया आलेली नाही.