दिल्लीहून सोमवारी दोहाला जाणाऱ्या कतार एअरवेजच्या विमानाचा मोठा अपघात टळला. उड्डाणादरम्यान या फ्लाइटमधून अचानक धूर येऊ लागला, त्यानंतर ते पाकिस्तानमधील कराची विमानतळावर आपत्कालीन स्थितीत उतरवण्यात आले. या विमानात 100 प्रवासी होते.

मिळालेल्या माहितीनुसार, कतार एअरवेजच्या QR579 विमानाने दिल्लीहून दोहाला उड्डाण केले. यादरम्यान विमानाच्या 'कार्गो होल्डमधून' अचानक धूर येऊ लागला. यानंतर विमान पाकिस्तानकडे वळवून कराची (Karachi) विमानतळावर (Airport) सुरक्षित लँड करण्यात आले. विमानाचा तपास सुरू असल्याचे अधिकाऱ्यांचे म्हणणे आहे.

कतार एअरवेजने या घटनेवर एक निवेदन जारी केले. एअरवेजकडून सांगण्यात आले की, विमानाची तपासणी केली जात आहे, तसेच प्रवाशांना दोहा येथे नेण्यासाठी दुसऱ्या विमानाची व्यवस्था करण्यात येत आहे. प्रवाशांच्या (Passengers) गैरसोयीबद्दल एअरवेजने माफी मागितली आहे.