असं म्हटलं जातं की “जिद्द असेल तर अशक्य काहीच नाही.” याचा प्रत्यय देत दिल्ली पोलिस दलातील एका महिला कॉन्स्टेबलने इतिहास रचला आहे. सात महिन्यांच्या गर्भावस्थेत असूनही तिने वेटलिफ्टिंग चॅम्पियनशिपमध्ये भाग घेतला आणि तब्बल १४५ किलोग्रॅम वजन उचलून सर्वांना अचंबित केले.

आंध्र प्रदेशातील विजयवाडा येथे आयोजित अखिल भारतीय पोलिस वेटलिफ्टिंग क्लस्टर २०२५-२६मध्ये दिल्ली पोलिसातील कॉन्स्टेबल सोनिका यादवने दमदार कामगिरी करत कांस्यपदक पटकावले. तिच्या स्टेजवर उतरण्यापूर्वी कोणीही असा अंदाज लावला नव्हता की ती इतिहास रचणार आहे. सामान्यतः गर्भधारणेदरम्यान महिलांनी शारीरिक श्रम कमी करावा असा सल्ला केला जातो. मात्र सोनिकाने तिच्या ध्येयासाठी स्वतःला सिद्ध केले.

मे महिन्यात ती गर्भवती असल्याचे समजल्यानंतर अनेकांना वाटले की सोनिका प्रशिक्षण थांबवेल. तिचे पतीदेखील सुरुवातीला याबाबत साशंक होते. परंतु सोनिकाने आपला फिटनेस रूटीन आणि वेटलिफ्टिंगचा सराव बंद केला नाही.

सोनिका म्हणते, “गर्भवती असल्याने कमजोर व्हावं, असा समज लोकांत आहे. पण योग्य मार्गदर्शन आणि योग्य पद्धतीने व्यायाम केल्यास आपण आणखी मजबूत होऊ शकतो.

तिने इंटरनेटवर शोध घेताना लुसी मार्टिन्स नावाच्या आंतरराष्ट्रीय स्तरावरील वेटलिफ्टरबद्दल वाचले, जिने स्वतःच्या गर्भावस्थेतही वेटलिफ्टिंग चालू ठेवले होते. सोनिकाने तिच्याशी सोशल मीडियावर संपर्क साधला आणि गर्भावस्थेत सुरक्षित प्रशिक्षण कसे ठेवावे याबाबत मार्गदर्शन घेतले.

स्पर्धेतील दमदार प्रदर्शन

स्पर्धेदरम्यान सोनिकाने १२५ किलो स्क्वॅट, ८० किलो बेंच प्रेस, १४५ किलो डेडलिफ्ट.

विशेष म्हणजे स्पर्धेच्या सुरुवातीच्या फेरीत कोणीही ती गर्भवती आहे हे ओळखू शकले नव्हते. तिने सैल आणि आरामदायी कॉम्पिटिशन किट परिधान केले होते. मात्र बेंच प्रेस राऊंडनंतर तिच्या पतीने तिला हलकेच आधार देताना ही गोष्ट लक्षात आली. सत्य समोर आल्यावर संपूर्ण स्टेडियममध्ये टाळ्यांचा गडगडाट उसळला.

इतर राज्यांतील महिला पोलिस अधिकाऱ्यांनी तिच्याकडे धाव घेत तिला शुभेच्छा दिल्या, तिच्यासोबत फोटो घेतले आणि तिच्या धाडसाची दाद दिली.

सोनिकाच्या या कामगिरीमुळे अनेक महिलांना गर्भावस्थेतही फिटनेस, आत्मविश्वास आणि मानसिक ताकद राखण्याची प्रेरणा मिळेल, असा विश्वास व्यक्त केला जात आहे. दिल्ली पोलिस दलानेही तिच्या या कामगिरीचे कौतुक केले आहे.

सोनिका यादवची ही कहाणी फक्त एक स्पर्धा जिंकण्याची नाही. तर मर्यादा मोडून स्वतःचं आयुष्य घडवण्याची आहे. तिची जिद्द, धैर्य आणि मेहनत अनेकांसाठी प्रेरणेचा स्रोत ठरणार हे निश्चित.