Delhi High Court On Rahul Gandhi Speech: काँग्रेस खासदार राहुल गांधी यांनी पंतप्रधान नरेंद्र मोदी यांच्याबाबत केलेल्या वक्तव्यावर गुरुवारी दिल्ली उच्च न्यायालयात सुनावणी झाली. या वक्तव्याबाबात खंडपीठाने टिप्पणी केली की, 'पंतप्रधानांना पॉकेटमार म्हणणे ही योग्य गोष्ट नाही.' यासोबतच न्यायालयाने निवडणूक आयोगाला या वक्तव्यासंबंधी अहवाल सादर करण्यास सांगितले आहे. न्यायालयाच्या आदेशानुसार निवडणूक आयोगाला 8 आठवड्यांच्या आत काय कारवाई केली यासंबंधी सांगावे लागणार आहे.

राहुल गांधी यांनी मोदींची तुलना पॉकेटमारांशी केली होती

गेल्या महिन्यात देशातील पाच राज्यांतील विधानसभा निवडणुकीच्या प्रचारादरम्यान राजस्थानमधील प्रचारसभेत काँग्रेसचे ज्येष्ठ नेते आणि वायनाडचे खासदार राहुल गांधी यांनी पंतप्रधान नरेंद्र मोदी यांच्याबद्दल वादग्रस्त वक्तव्य केले होते. राहुल यांनी आपल्या भाषणात म्हटले होते की, ''जसे खिसे कापणाऱ्यांच्या गटात एक जण अचानक समोर येतो आणि लक्ष दुसरीकडे वळवतो, दुसरा मागून खिसा कापून निघून जातो आणि तिसरा गरज पडेल तेव्हा लोकांना घाबरवू लागतो. हीच बाब भाजपच्या नेतृत्वातही आहे. मोदीजी लक्ष दुसरीकडे वळवतात. त्यांचे उद्योगपती मित्र लोकांचे खिसे कापतात. नंतर गृहमंत्री अमित शाह घाबरवण्याचा प्रयत्न करतात.''

23 नोव्हेंबर रोजी पाठवलेल्या नोटीसमध्ये न्यायालयाने म्हटले होते की, निवडणूक आयोगानेच या प्रकरणी योग्य ती कारवाई करणार असल्याचे सांगितले होते. याचिकाकर्ते भरत नागर यांनी उच्च न्यायालयाला सांगितले की, 22 नोव्हेंबर रोजी राहुल गांधी यांनी पंतप्रधानांसह सर्वोच्च सरकारी पदांवर असलेल्या व्यक्तींवर घृणास्पद आरोप करणारे भाषण केले होते, ज्यामध्ये राहुल गांधी यांनी पंतप्रधानांना पॉकेटमार म्हटले होते.