तेलंगणाची राजधानी हैदराबादमधून एक हृदय पिळवटून टाकणारा व्हिडिओ व्हायरल झाला आहे. जिथे एका तरुणीने मेट्रो स्टेशनच्या इमारतीवरून उडी मारून आत्महत्या (Suicide) केली. जखमी अवस्थेत मुलीला जवळच्या रुग्णालयात दाखल करण्यात आले. उपचारादरम्यान तिचा मृत्यू झाला. शबनम असे या 21 वर्षीय तरुणीचे नाव असून, ती बंजारा हिल्स येथील श्रीराम नगर भागातील रहिवासी होती. मुलीने ईएसआर मेट्रो (Metro) स्टेशनवरून उडी मारून आत्महत्या केली.

तपासादरम्यान तरुणीला लव्ह मॅरेज करायचे असल्याचे पोलिसांना समजले. मात्र त्यांचे कुटुंबीय या लग्नासाठी तयार नव्हते.

मंगळवारी तिचा घरच्यांशी लग्नावरून वाद झाला आणि ती घरातून निघून गेली. काही वेळाने तिने मेट्रो स्टेशनच्या इमारतीवरून उडी मारली. पोलिसांनी (Police) स्टेशनवर लावण्यात आलेल्या सीसीटीव्ही फुटेजची छाननी सुरू केली. जेणेकरून या प्रकरणाची चौकशी करता येईल. मृतदेह शवविच्छेदनासाठी पाठवण्यात आला असून या प्रकरणाचा तपास सुरू असल्याचे पोलिसांनी सांगितले.