तपास यंत्रणा ईडीने कर्नाटकचे काँग्रेस आमदार के.सी वीरेंद्र यांना अटक केली आहे. २२ आणि २३ ऑगस्ट रोजी ईडीने के.सी वीरेंद्र यांच्या बेंगळुरू, हुबळी, मुंबई, जोधपूर, गोवा येथील अनेक मालमत्तांवर छापे टाकले. गोव्यात केसी वीरेंद्र यांच्या पाच कॅसिनोवर छापे टाकण्यात आले. के. सी अनेक ऑनलाइन बेटिंग साइट्स चालवत असल्याचे तपासातून समोर आले आहे.

छाप्यादरम्यान ईडीने काँग्रेस आमदाराच्या जागेतून १२ कोटी रुपये रोख रक्कम जप्त केली आहे. यामध्ये १ कोटी रुपयांचे परकीय चलन समाविष्ट आहे आणि अनेक आलिशान वाहने देखील सापडली आहेत. याशिवाय सुमारे ६ कोटी रुपयांचे सोन्याचे दागिने आणि १० किलो चांदी देखील सापडली आहे.

ईडीनकडून ३० ठिकाणी छापे

गंगटोकमधून आमदार के. सी वीरेंद्र यांना अटक करण्यात आली आहे. के. सी त्यांच्या काही साथीदारांसह कॅसिनोसाठी जमीन भाड्याने देण्यासाठी गंगटोकला गेले होते, अशी माहित समोर आली आहे.

ईडीने वीरेंद्र यांच्या ३० ठिकाणी छापे टाकले आणि त्यानंतर १७ बँक खाती आणि दोन बँक लॉकर गोठवले आहेत. वीरेंद्रचा भाऊ के.सी नागराज आणि त्याचा मुलगा पृथ्वी एन. राज यांच्या घरातून अनेक महत्त्वाची कागदपत्रे जप्त करण्यात आली आहेत.

काही दिवसांपूर्वी ईडीने कर्नाटकातील आणखी एक काँग्रेस आमदार सतीश कृष्णा साईल यांच्या घरावर आणि परिसरात छापेमारी करण्यात आली तेथेही तपास यंत्रणेला बेहिशेबी संपत्ती सापडली होती. ईडीने छाप्यादरम्यान १.७ कोटी रुपये आणि ६.८ किलो सोने जप्त केले. कृष्णा साईल हे कारवार-अंकोला मतदारसंघाचे आमदार आहेत.