छत्तीसगढमधील सक्ती जिल्ह्यातून एक धक्कादायक प्रकार समोर आला आहे. येथे 11 वी शिकत असणाऱ्या तरुणीने अंधश्रद्धेच्या नावाखाली स्वत:ची जीभ कापली. सक्ती जिल्ह्यातील देवरघाटा गावातील आचारीपाली येथील 16 वर्षीय तरुणीने आपली जीभ कापून ती भोले बाबाला अर्पण केली. एवढ्यावरच न थांबता तिने स्वत:ला मंदिरात कोंडून घेतले आणि ध्यानाला बसली.

दरम्यान, पोलिसांना (Police) जशी या घटनेची माहिती मिळाली तशी त्यांनी घटनास्थळी धाव घेतली. मात्र गावातील लोकांनी पोलिसांना घेराव घालत मंदिरात जाऊ दिले नाही. हे प्रकरण दाभ्रा पोलीस ठाण्याच्या हद्दीत घडले. सोमवारी सकाळी 7 वाजता तरुणीने तिची जीभ कापून ती घराजवळील तलावाच्या काठावरील भोले बाबाच्या मंदिरात अर्पण केली. तरुणीने एक चिठ्ठीही लिहिली.

दुसरीकडे, तरुणीच्या पालकांना पोलीस आणि प्रशासनाच्या अधिकाऱ्यांनी समजावून तिला रुग्णालयात (Hospital) दाखल करण्याची विनंती केली, मात्र पालकांनी स्पष्ट नकार दिला. घटनास्थळी पोलीस आणि प्रशासनाचे अधिकारी, रुग्णवाहिका आणि डॉक्टरांचे पथक उपस्थित आहे. तरुणीने असे पाऊल का उचलले याची चौकशी पोलिस स्थानिकांकडे करत आहेत.