Assembly Elections: कर्नाटकचे माजी मुख्यमंत्री आणि भाजप नेते बीएस येडियुरप्पा यांनी शुक्रवारी मोठी घोषणा केली आहे. बीएस येडियुरप्पा यांनी पुढील वर्षी होणाऱ्या विधानसभा निवडणुकीसाठी शिकारीपुरा जागा सोडणार असल्याचे म्हटले आहे. त्यांनी सोडलेल्या जागेवर त्यांचा मुलगा बी. वाय विजयेंद्र निवडणूक लढवणार असल्याचेही त्यांनी सांगितले. अशा स्थितीत त्यांच्या या घोषणेकडे निवडणुकीच्या राजकारणातील डावाचा शेवट म्हणून पाहिले जात आहे.

येडियुरप्पा (B. S. Yediyurappa) म्हणाले, 'मी निवडणूक लढवत नाही, विजयेंद्र शिकारीपुरातून निवडणूक लढवणार आहेत. शिकारीपुरा येथील जनतेला मी हात जोडून प्रार्थना करतो की, ते माझ्यापेक्षा मोठ्या मताधिक्याने विजयी व्हावेत.'

दुसरीकडे, विजयेंद्र यांनी जुन्या म्हैसूर प्रदेशातून निवडणूक लढवावी या कार्यकर्त्यांच्या मागणीवर येडियुरप्पा म्हणाले, "तिथून निवडणूक (Election) लढवण्याचा त्यांच्यावर खूप दबाव आहे, परंतु मी जागा सोडत असून निवडणूक लढवणार नाही. त्यामुळे विजयेंद्र शिकारीपुरामधून निवडणूक लढवणार आहेत."

2020 मध्ये विजयेंद्र यांना उपाध्यक्ष बनवण्यात आले

विजयेंद्र यांना जुलै 2020 मध्ये कर्नाटक (Karnataka) भाजपचे उपाध्यक्ष बनवण्यात आले. मे 2018 च्या विधानसभा निवडणुकीपूर्वी म्हैसूरमधील वरुणा मतदारसंघातून निवडणूक लढवण्याचे विजयेंद्र यांनी नाकारल्यानंतर लगेचच पक्षाने त्यांना भाजप युवा शाखेचे सरचिटणीस म्हणून नियुक्त केले होते.

पोटनिवडणुकीच्या विजयात महत्त्वाची भूमिका

2019 आणि 2020 मध्ये झालेल्या पोटनिवडणुकीत विजयेंद्र पक्षात चर्चेत राहिले. पोटनिवडणुकीत केआर पेट आणि सिरा विधानसभा मतदारसंघात भाजपच्या विजयात त्यांनी महत्त्वाची भूमिका बजावली होती.