Viral Elephant Video: हत्ती त्याच्या विशालतेसाठी आणि ताकदीसाठी ओळखला जातो. त्याचबरोबर तो जंगलातील सर्वात बुद्धिमान प्राणीही मानला जातो. नुकताच हत्तीच्या बुद्धिमत्तेचा एक व्हिडिओ सध्या सोशल मीडियावर (Social Midea) मोठ्या प्रमाणात व्हायरल होत आहे. यात एक लहान हत्ती रस्त्यावर पडलेला कचरा आपल्या सोंडेने उचलून डस्टबिनमध्ये टाकताना दिसत आहे. हे हृदयस्पर्शी आणि अतिशय सुंदर दृश्य आहे.

आधी हा व्हिडिओ पाहा!

व्हिडिओमध्ये काय दिसले?

व्हिडिओमध्ये दिसते की, एक लहान हत्ती आपल्या आईसोबत रस्त्याने चालत आहे. अचानक त्याची नजर रस्त्यावर पडलेल्या कचऱ्यावर पडते. जिथे आपण मानव अनेकदा अशा गोष्टींकडे दुर्लक्ष करतो, तिथे या चिमुकल्या गजराजाने असे काही केले, ज्यामुळे सर्वजण थक्क झाले. तो थांबला, आपल्या सोंडेचा आणि पायाचा वापर करुन कचरा उचलला आणि जवळच ठेवलेल्या डस्टबिनमध्ये काळजीपूर्वक टाकला. या छोट्याशा कृतीने केवळ या गजराजाची बुद्धिमत्ताच नव्हे, तर पर्यावरणाबद्दलची (Environment) त्याची संवेदनशीलताही दाखवून दिली.

दरम्यान, हा व्हिडिओ 'एक्स' (पूर्वीचे ट्विटर) सोशल साईटवर @Sheetal2242 या अकाउंटवरुन शीतल यादव नावाच्या युझरने शेअर केला आहे. या व्हिडिओला लाखो लोकांनी पाहिले असून हजारो लोकांनी लाईक केले आहे.