तेलंगणमधून एक घटना समोर आली आहे. हैद्राबादमध्ये सुमारे 50 पुरुषांच्या जमावाने बळजबरीने घरात घुसून तेलंगणातील एका 24 वर्षीय महिलेचे अपहरण केले. ही महिला डॉक्टर असल्याचे सांगितले जात आहे. या घटनेचा एक धक्कादायक व्हिडिओ सोशल मीडियावर व्हायरल होत आहे. महिलेंचे अपहरण झाल्यानंतर पोलिसांनी एक तास केलेल्या ऑपरेशननंतर महिलेची सुटका करण्यात आली आहे.

हैदराबादजवळील आदिबाटला गावात ही घटना घडली. 50 पुरुषांच्या जमावाने महिलेच्या घरातून अपहरण करण्यात आले. वृत्त एएनआय या वृत्तसंस्थेने दिलेल्या बातमीनुसार, सुमारे 100 तरुण त्यांच्या घरात घुसले आणि वैशाली यांना जबरदस्तीने घेऊन गेले, असा आरोप महिलेच्या पालकांनी केला आहे. व्हिडीओमध्ये किमान 30 लोक घराची तोडफोड करताना, कारच्या काचा फोडताना तसेच, एका व्यक्तीला घराबाहेर ओढतांना आणि लाठ्या-रॉडने मारहाण करताना दिसत आहेत.

पोलिस अधिकाऱ्यांनी वैशाली यांच्या पालकांशी बोलून याबाबत माहिती घेतली आहे. आयपीसी कलम 307 आणि धमकावण्याशी संबंधित इतर कलमांखाली याप्रकरणी गुन्हा दाखल करण्यात आला आहे. हा नक्कीच एक गंभीर गुन्हा असून, पुढील तपास सुरू आहे. अशी माहिती रचकोंडा आयुक्तालयाचे अतिरिक्त पोलीस आयुक्त सुधीर बाबू यांनी दिली.

दरम्यान, वैशालीच्या कुटुंबियांनी नवीन रेड्डी नावाच्या एका व्यक्तीवर याबाबत आरोप केला आहे. नवीन तिच्याशी लग्न करण्यासाठी वैशालीला त्रास देत होता. यातूनच तिचे अपहरण केल्याचा आरोप त्यांनी केला आहे.