भाजप प्रवक्त्या नुपूर शर्मा यांनी पैगंबर मोहम्मद यांच्याबाबत केलेल्या वक्तव्यानंतर वाद सुरुच आहे. दरम्यान, नेदरलँड्स हाऊस ऑफ रिप्रेझेंटेटिव्हचे सदस्य आणि पार्टी फॉर फ्रीडम, नेदरलँडचे अध्यक्ष गीर्ट वाइल्डर्स यांनी नुपूर शर्मा यांना पाठिंबा दिला आहे. खासदार गीर्ट वाइल्डर्स यांचे वक्तव्य चर्चेत आहे. भारताने इस्लामिक देशांची माफी मागण्याची गरज नाही, अशी प्रतिक्रिया त्यांनी दिली आहे. (appeasement never works says netherlands lawmaker geert wilders comes out in support of nupur sharma)

भारत माफी का मागतोय?

एका ट्विटमध्ये गीर्ट वाइल्डर्स म्हणाले की, ''तुष्टीकरण कधीही काम करत नाही. हे फक्त गोष्टी खराब करते. तेव्हा माझ्या भारतातील प्रिय मित्रांनो, इस्लामिक देशांना घाबरु नका. स्वातंत्र्यासाठी उभे राहा. अभिमान बाळगा आणि प्रेषितांबद्दल सत्य बोलणाऱ्या तुमच्या नेत्या नुपूर शर्मांचे रक्षण करण्याचा निर्धार करा.''

त्यांनी पुढे म्हटले आहे की, 'प्रेषित मोहम्मद यांच्याबद्दल खरे बोलल्यामुळे अरब आणि इस्लामिक देश भारतीय नेत्या नुपूर शर्मा (Nupur Sharma) यांच्यावर नाराज आहेत, जे हास्यास्पद आहे.'

गीर्ट वाइल्डर्सला जीवे मारण्याची धमकी?

खासदार गीर्ट वाइल्डर्स हे उजव्या विचारसरणीच्या पक्षाचे नेते आहेत. आपल्याला जीवे मारण्याची धमकी देण्यात आल्याचा दावा त्यांनी केला. रोज मला मोहम्मद यांच्या नावाने जीवे मारण्याची धमकी दिली जात असल्याचे त्यांनी म्हटले आहे. धमक्या देऊन काही होणार नाही कारण मी सत्य बोलणे थांबवणार नाही.

भाजपने नुपूरची हकालपट्टी केली

नुपूर शर्मा यांनी इस्लाम आणि पैगंबर यांच्याबद्दल टीव्ही शो दरम्यान वादग्रस्त वक्तव्य केले. त्यानंतर भाजपने (BJP) त्यांची पक्षातून हकालपट्टी केली. भाजपने दिल्ली (Delhi) भाजपचे प्रवक्ते नवीन कुमार जिंदाल यांचीही हकालपट्टी केली आहे. आखाती देशांच्या विरोधानंतर भाजपने हे पाऊल उचलले आहे.