Aam Aadmi Party: आम आदमी पार्टीचे (आप) सर्वेसर्वा अरविंद केजरीवाल यांनी गुजरातमधील मुख्यमंत्री पदाच्या उमेदवाराची घोषणा केली आहे. शुक्रवारी 'पुनरावलोकन'चा निकाल जाहीर करताना दिल्लीच्या मुख्यमंत्र्यांनी ही घोषणा केली. केजरीवाल म्हणाले की, "आज आम्ही गुजरातचा मुख्यमंत्रीपदाचा उमेदवार नाही, तर गुजरातचा पुढचा मुख्यमंत्री घोषित करत आहोत. आम्ही 5-7 दिवसांपूर्वी फोन नंबर आणि ईमेल देऊन लोकांचे मत विचारले. 4 प्रकारे मेसेज करायला सांगितले होते. यामध्ये लोकांनी भरघोस मतदान केले. 16,48,500 मते प्राप्त झाली. 73% लोकांनी 'इसुदान गढवी' यांचे नाव घेतले.''

तसेच, गुजरातमध्ये आम आदमी पार्टी सरकार स्थापन करेल, असा विश्वास व्यक्त करत अरविंद केजरीवाल (Arvind Kejriwal) म्हणाले की, 'गुजरातमध्ये मुख्यमंत्रीपदाच्या उमेदवाराची नव्हे, तर गुजरातच्या पुढील मुख्यमंत्र्याच्या नावाची घोषणा करत आहोत.'

केजरीवाल पुढे म्हणाले की, "आम आदमी पार्टी (Aam Aadmi Party) एक नवी आशा आहे. आम्ही खोलीत बसून मुख्यमंत्री कोण होणार हे ठरवत नाही. पंजाबमध्ये, भगवंत मान यांना मुख्यमंत्रीपदाचे उमेदवार म्हणून पंजाबच्या जनतेने निवडून दिले. दिल्लीत आम्ही पहिल्यांदा जिंकलो तेव्हा आम्हाला एकाही सर्व्हेने एकही जागा दिली नाही. गुजरातमध्येही (Gujarat) दिल्लीसारखे सगळे सर्व्हे फेल होतील आणि आमचे सरकार स्थापन होईल.'

दुसरीकडे, 10 जानेवारी 1982 रोजी जामनगरमधील एका गावात जन्मलेले गढवी हे व्यवसायाने पत्रकार आहेत. गुजराती पत्रकारितेतील टीव्हीचा ते एक प्रसिद्ध चेहरा आहेत. प्राइम टाइम अँकरिंगमुळे लोकप्रिय झालेले गढवी एका गुजराती वाहिनीचे प्रमुख देखील राहिले आहेत. जून 2021 मध्ये त्यांनी पत्रकारितेला अलविदा म्हणत आम आदमी पार्टीसोबत राजकीय कारकिर्दीला सुरुवात केली.