केंद्रीय गृह मंत्रालयाकडून 151 पोलीस कर्मचार्‍यांना तपासात उत्कृष्ट कामगिरी केल्याबद्दल केंद्रीय गृहमंत्री पदक 2022 प्रदान करण्यात आले. या 151 पोलिसांमध्ये सीबीआयचे 15, महाराष्ट्रातील 11, मध्य प्रदेश आणि उत्तर प्रदेशातील 10-10, राजस्थान आणि पश्चिम बंगालमधील 8-8 पोलिसांचा समावेश आहे. याशिवाय इतर राज्यांतील पोलिसांनाही तपासातील उत्कृष्टतेचे 'गृहमंत्री पदक' प्रदान करण्यात आले आहे. अधिकाऱ्यांनी सांगितले की, 151 पोलिसांपैकी 28 महिला पोलिस अधिकाऱ्यांनाही पदके देण्यात आली आहेत.

2018 पासून देण्यात येत आहे

हे पदक 2018 पासून कोणत्याही गुन्ह्याच्या तपासात (Excellence in Investigation) उच्च मापदंड प्रस्थापित करून कामात प्रामाणिकपणा, निष्ठा आणि असामान्य धाडस दाखविणाऱ्या पोलीस कर्मचाऱ्यांना देण्यात येत आहे. पोलीस (Police) कर्मचाऱ्यांना प्रोत्साहन देणे हा या पदकाचा उद्देश आहे. 2018 मध्ये केंद्रीय गृहमंत्री राजनाथ सिंह (Rajnath Singh) यांनी पोलिसांना प्रोत्साहन देण्यासाठी पाच पोलिस पदके सुरू केली होती. यामध्ये स्पेशल ऑपरेशन्स मेडल, पोलिस इंटरनल सिक्युरिटी सर्व्हिस मेडल, एक्स्ट्राऑर्डिनरी स्किल्स मेडल, उत्कृष्ठ आणि अति उत्कृष्ट सेवा मेडल आणि मेडल ऑफ एक्सलन्स इन इन्व्हेस्टिगेशन यांचा समावेश आहे.

2020 मध्ये 121 पोलिसांना पदके मिळाली

2020 मध्ये 121 पोलिसांना केंद्रीय 'गृहमंत्री पदक ऑफ एक्सलन्स इन इन्व्हेस्टिगेशन' देण्यात आले. यापैकी 15 सीबीआयचे, 10 मध्य प्रदेश आणि महाराष्ट्र पोलिसांचे, आठ उत्तर प्रदेश पोलिसांचे, सात केरळ आणि पश्चिम बंगाल पोलिसांचे आणि उर्वरित इतर राज्ये/केंद्रशासित प्रदेशातील होते. यामध्ये 21 महिला पोलिसांचा समावेश होता.