पणजी: स्वस्तिक पुरस्कृत पणजी येथील संजीवन संगीत अकादमीत परंपरा या सदराखाली देशातील वेगवेगळ्या कलाकारांना निमंत्रित केले जाते. आजपर्यंत पं. ऋत्विक सान्याल, रिंपा सिवा, अनोल चॅटर्जी, मोमिन खाँ, मेहेर पराळीकर, जाझीम शर्मा, डॉ. प्रवीण गावकर यांनी कला सादर केलेली आहे. बुधवार दिनांक 9 मार्च रोजी संध्याकाळी 6 वाजता प्रसिद्ध व्हायोलिन वादक श्री. राजन माशेलकर यांच्या व्हायोलिन वादनाचा कार्यक्रम आयोजित केला आहे.

या कार्यक्रमात त्यांना तबल्यावर मयंक बेडेकर हे साथ करणार आहेत. राजन माशेलकर हे मूळ गोव्याचे असून गेली 3 दशके मुंबईत स्थायिक आहेत. प्रसिद्ध व्हायोलिन वादक पद्मश्री पंडित डी.के. दातार यांचे ते शिष्य आहेत. स्वतंत्र व्हायोलिन वादनाबरोबरच अनेक कलाकारांना त्यांनी साथ केलेली आहे. देश-विदेशात त्यांचे अनेक कार्यक्रम झालेले आहेत.