गोवा: येत्या 27 मार्च रोजी, जागतिक रंगभूमी दिनानिमित्त गोव्याच्या ‘थिएटर फ्लेमिंगो’ने नाट्यप्रयोग आणि ऑनलाईन नाट्य कार्यशाळेचे आयोजन केले आहे.

‘अभिनेत्यासाठी दैनंदिन रियाज’ या विषयावर त्या दिवशी सकाळी 7 ते 8.30 या वेळात ऑनलाइन प्रात्यक्षिक सादर होईल. सायंकाळी फोंडा येथील राजीव गांधी कलामंदिरमध्ये ‘टोबा टेक सिंग’ (हिंदी), डंब इंडायजेशन (शब्द विरहित), आणि ‘हत्तमालच्या पल्याड’ (मराठी) हे तीन नाट्यप्रयोग सादर होतील. ‘टोबा टेक सिंग’ हे सोलो सादरीकरण, सादत हसन मंटो यांच्या लघुकथेवर आधारलेले आहे. विद्यानिधी वनारसे यांनी या लघुनाट्याचे दिग्दर्शन केले आहे. मंदार जोग हे या प्रयोगात भूमिका करतात.(World Theater Day)

‘डंब इंडायजेशन’ हे शारीरिक सादरीकरण आहे. केतन जाधव यांच्या संकल्पनेतून सादर होणारा हा प्रयोग त्यांनीच दिग्दर्शित केला आहे. मोदी सानप यांची भूमिका या प्रयोगात आहे.‘हत्तमालच्या पल्याड’ हा मूळ बादल सरकार यांच्या बंगाली नाटकाचा हा मराठी अनुवाद आहे. महेश खांदारे यांनी दिग्दर्शित केलेल्या या नाटकात श्रावण फोंडेकर, प्रणव टेंगसे आणि प्राजक्ता कवळेकर यांच्या भूमिका आहेत. राजीव गांधी कला मंदिरच्या एरिना थिएटरमध्ये या तिन्ही नाटकांचे प्रयोग सायंकाळी 7.30 वाजता सुरू होतील.