भारतातील बिग बुल (Big Bull) अशी ओळख कमावलेले ज्येष्ठ गुंतवणूकदार राकेश झुनझुनवाला (Rakesh Jhunjhunwala) यांचे आज (रविवारी) आकस्मिक निधन झाले. झुनझुनवाला यांच्या निधनाबद्दल पंतप्रधान, अर्थमंत्री, केंद्रीय मंत्री यांच्यासह उद्योगपतींनी शोक व्यक्त केला. झुनझुनवाला 40 हजार कोटींहून अधिक संपत्ती मागे सोडून गेले आहेत. तसेच, नुकतेच सुरू झालेल्या अकास एअरलाईन्समध्ये देखील त्याची भागीदारी आहे. त्यांनी उभारलेल्या या साम्राज्य कोण सांभाळणार असा प्रश्न प्रत्येकाला पडला आहे.

राकेश झुनझुनवाला यांची 'रेअर एंटरप्रायझेस' नावाची कंपनी आहे. हीच कंपनी बिग बुलच्या पोर्टफोलिओचे व्यवस्थापन करते. राकेश झुनझुनवाला आणि त्यांच्या पत्नीची अकासा एअरमध्ये एकूण 40 टक्क्यांहून अधिक भागीदारी आहे. झुनझुनवाला हे स्टार हेल्थ आणि अलाईड इन्शुरन्सचे प्रमोटर होते. जून तिमाहीत त्यांची हिस्सेदारी 17.5 टक्क्यांच्या जवळ होती. राकेश झुनझुनवाला यांचे साम्राज्य सांभाळण्याची जबाबदारी आता पत्नीवर आली आहे. रेखा झुनझुनवाला आणि त्यांचा मुलगा राकेश झुनझुनवाला यांचे रेअर एंटरप्रायझेस संभाळू शकतात.

राकेश झुनझुनवाला यांच्या पश्चात पत्नी रेखा झुनझुनवाला, मुलगी निष्ठा झुनझुनवाला, मुलगा आर्यमन आणि आर्यवीर झुनझुनवाला असा परिवार आहे.

दरम्यान, राकेश झुनझुनवाला यांच्या निधनामुळे अकासा एअरलाइन्स आणि अन्य व्यवसायांना मोठ्या आव्हानांचा सामना करावा लागू शकतो. एका इव्हेंटमध्ये बिग बुल झुनझुनवाला यांनी त्यांचे वडील हे त्यांचे पहिले रोल मॉडेल आहेत. याशिवाय टाटा समूह, गुंतवणूकदार आणि डी-मार्टचे संस्थापक राधाकिशन दमानी यांनाही झुनझुनवाला आपला आदर्श मानत होते.