Inflation Rate: वाढत्या महागाईवर नियंत्रण ठेवण्यासाठी सरकारकडून सातत्याने प्रयत्न केले जात आहेत. महागाई नियंत्रणात ठेवण्यासाठी रिझर्व्ह बँक ऑफ इंडियाने (RBI) गेल्या काही महिन्यांत रेपो दरात 1.90 टक्क्यांनी वाढ केली होती. यानंतर महागाईत थोडी नरमाई आली आहे. मात्र, ती अजूनही सरकारच्या समाधानकारक आकड्यापेक्षा वरच आहे. दरम्यान, अर्थमंत्री निर्मला सीतारामन म्हणाल्या की, 'मोदी सरकार महागाई नियंत्रणात ठेवण्यासाठी सक्षम आहे.'

जानेवारीपासून महागाईचा दर 6 टक्क्यांच्या वर राहिली

अन्नधान्याच्या किमतींवरील पुरवठा-बाजूच्या दबावाला तोंड देण्यासाठी 'सुव्यवस्थित यंत्रणे'मुळे भारत महागाईचा अधिक चांगल्या पद्धतीने सामना करु शकेल, असा विश्वास त्यांनी व्यक्त केला. या वर्षी जानेवारीपासून किरकोळ चलनवाढीचा दर सातत्याने 6 टक्क्यांच्या वर राहिला आहे. ही पातळी रिझर्व्ह बँक ऑफ इंडियाच्या (RBI) सहा टक्के समाधानकारक पातळीपेक्षा जास्त आहे.

भारत महागाईचा सामना करु शकेल

'रॉयटर्स नेक्स्ट' या ऑनलाइन कार्यक्रमाला संबोधित करताना सीतारामन म्हणाल्या की, 'भारत महागाईचा (Inflation) अधिक चांगल्या पद्धतीने सामना करु शकेल. रिझव्‍‌र्ह बँकेकडून महागाई कमी होण्याचे संकेत मिळत आहेत. पुढील वर्षाच्या सुरुवातीस किंवा मध्यात ती सामान्य पातळीवर येईल.' पुढे, सितारामन यांनी मान्य केले की, महागाईवर बाह्य घटकांचा प्रभाव कायम राहणार आहे, परंतु इतर देशांच्या तुलनेत खाद्य उत्पादने आणि ऊर्जा पुरवठ्याच्या बाबतीत भारत 'चांगल्या' स्थितीत आहे.

चलनवाढ भविष्यात अस्थिर राहील

सीतारामन पुढे म्हणाल्या की, 'मला वेगाने वाढणारी भारतीय अर्थव्यवस्था अपेक्षित आहे.' कच्च्या तेलासारख्या वस्तूंच्या आयातीमुळे महागाईतील चढ-उतार यापुढेही कायम राहू शकतो, अशी कबुलीही त्यांनी दिली. त्या पुढे म्हणाल्या की, 'कच्चे तेल सर्वांना परवडणाऱ्या किमतीत मिळायला हवे आणि ते शस्त्र म्हणून वापरता येणार नाही.'