Cement Price Hike : जर तुम्ही घराची दुरुस्ती करण्याचा विचार करत असाल तर तुमचा खिसा रिकामा होण्याची शक्यता आहे. तेल ते बिस्किटांच्या महागाईमुळे सर्वसामान्य आधीच पिचून गेली आहे. त्यात मूलभूत गरजांपैकी एक म्हणजे घर. आता घर बांधणे खूप महाग होणार आहे. सिमेंट कंपन्या एप्रिलमध्ये आपल्या दरात मोठी वाढ करणार आहेत. माहितीनुसार, या महिन्यात देशांतर्गत बाजारपेठेत सिमेंटची किंमत (Cement Market) 25 ते 50 रुपये प्रति पोती वाढू शकते.

उत्पादकांनी रशिया-युक्रेन युद्धामुळे झालेली दरवाढ ग्राहकांपर्यंत पोहोचवण्यास सुरुवात केली आहे. गेल्या 12 महिन्यांत सिमेंटची किंमत 390 रुपये प्रति पोतीपर्यंत वाढली आहे. उत्पादकांनी आता खर्च वाढल्याचा भार ग्राहकांवर टाकला आहे. यामुळे सिमेंट 25-50 रुपयांनी महाग होऊ शकते.

मार्चमध्ये कच्च्या तेलाच्या किमती सरासरी 115 डॉलर प्रति बॅरल होत्या. याशिवाय विविध कारणांमुळे आंतरराष्ट्रीय कोळशाच्या किमतीही वाढल्या आहेत. वीज आणि इंधनाच्या किमतीत झालेल्या वाढीमुळे रस्तेमार्गे मालवाहतुकीचे शुल्कही वाढले आहे. क्रिसिल रिसर्चचे संचालक एच गांधी म्हणाले की, आर्थिक वर्ष 2021-22 च्या पहिल्या सहामाहीत सिमेंटची मागणी 20 टक्क्यांनी वाढली आहे. पण अवकाळी पाऊस, मजूर न मिळाल्याने दुसऱ्या सहामाहीचा वेग मंदावला.

“2022-23 या आर्थिक वर्षात सिमेंटचे प्रमाण 5 ते 7 टक्क्यांनी वाढण्याची अपेक्षा आहे. मूलभूत पायाभूत सुविधा असलेल्या छोट्या शहरांमध्ये परवडणाऱ्या घरांवर भर देणे हे त्याचे कारण आहे. मात्र, बांधकाम खर्चात वाढ झाल्याने मागणीत वाढ होण्यावर काही प्रमाणात अंकुश राहील.