Girls Football Tournament: रोझरी उच्च माध्यमिक विद्यालयाच्या मुली राष्ट्रीय स्पर्धेस पात्र

Navelim Rosary College Girls Football Team: नावेलीच्या रोझरी उच्च माध्यमिक विद्यालयाच्या मुलींनी सलग तिसऱ्या वर्षी राष्ट्रीय पातळीवरील मुलींच्या सुब्रतो कप फुटबॉल स्पर्धेत गोव्याचे प्रतिनिधित्व करण्याचा मान मिळविला.

राज्यस्तरीय अंतिम सामना जिंकताना त्यांनी उत्तर जिल्हा विजेत्या हरमलच्या अवर लेडी ऑफ माऊंट कार्मेल हायस्कूलचा ७-० असा धुव्वा उडविला.

रोझरी उच्च माध्यमिक विद्यालयाने दक्षिण जिल्हा पातळीवर वर्चस्व मिळविले होते. क्रीडा व युवा व्यवहार संचालनालयातर्फे घेण्यात आलेल्या स्पर्धेचा राज्यस्तरीय अंतिम सामना शनिवारी सांताक्रूझ येथील मैदानावर झाला.

रोझरी उच्च माध्यमिक विद्यालयाच्या एकतर्फी विजयात फातिमा ब्रागांझा हिने चार गोल केले. रिया पत्रे हिने दोन, तर शेरी फर्नांडिस हिने एक गोल नोंदविला. या महिन्यात दिल्ली येथे मुलींची राष्ट्रीय सुब्रतो कप फुटबॉल स्पर्धा होणार आहे, त्यावेळी रोझरी हायस्कूल गोव्याचे प्रतिनिधित्व करेल.

क्रीडा खात्याचे साहाय्यक शारीरिक शिक्षण अधिकारी पांडुरंग नाईक, विभागीय क्रीडा आयोजक संजय शिरोडकर, राज्य क्रीडा आयोजक अनंत सावळ यांच्या उपस्थितीत बक्षीस वितरण झाले.