Vegetable Rates: मुसळधार पावसाचा फटका; गोव्यात भाज्यांचे दर वाढले

Panjim,Goa

पणजी: गोव्यात भाज्यांच्या दरांमध्ये वाढ झाली असल्याने स्थानिकांना कष्ट सोसावे लागू शकतात. गोव्यात बरीच भाजी शेजारी राज्यांमधून आणली जाते, मात्र गेल्या काही दिवसांपासून महाराष्ट्र आणि कर्नाटकात जोरदार पाऊस पडत असल्याने भाज्या कुजल्या असून भाज्यांच्या दरांमध्ये वाढ झाली आहे.

पणजीच्या बाजारात 50 रुपये किलो प्रमाणे टोमॅटो विकला जातोय. कांद्याचे दर बरेच महागले असून कांदा 70 रुपये किलो प्रामणे विकला जातोय. गाजर 80 रुपये किलो, आले 160 रुपये किलो प्रमाणे भाजी विकली जात आहे, मात्र मिरचीचे दर आटोक्यात असल्याची माहिती स्थानिक भाजी विक्रेत्याने दिली.

गोव्यातील भाजीविक्रेत्यांचा अनुमानाप्रमाणे हा दर आणखीन एक-दोन महिन्यांपर्यंत असाच राहण्याची शक्यता आहे. दोन्ही शेजारी राज्यांमध्ये अतिवृष्टी होत असून भाजी वाटेतच कुजल्याने महागली आहे.