Pooja Naik Case: सागरचं खातं ‘नील’, पोलिस बुचकळ्यात; संशयित पूजा नाईकची दिवाळी कोठडीतच

फोंडा: उसगाव येथील एका महिलेला नोकरी देण्याच्या आमिषाने पंधरा लाख रुपयांना फसवलेल्या आयआरबी पोलिस सागर नाईक याला अखेर मंगळवारी उशिरा जामीन मंजूर करण्यात आला. विशेष म्हणजे, १५ लाख रुपयांना फसविल्याचा आरोप असलेल्या सागर नाईकच्या बँक खात्यात एकही पैसा नसल्याचे पोलिस तपासात उघड झाले आहे.

या प्रकरणात एका मुख्याध्यापिकेला अटक करून नंतर जामिनावर सोडले होते, तर अन्य एक महिला सध्या बेपत्ता असून तिचा शोध सध्या सुरू आहे. सागर नाईक याने १५ लाख रुपये स्वीकारले असल्याचा आरोप उसगावातील फसविल्या गेलेल्या महिलेने केला आहे. मात्र, बँक खात्यात त्याच्या नावावर एकही पैसा नसल्याने पोलिस बुचकळ्यात पडले आहेत.

पूजाला पाच दिवसांचा रिमांड

डिचोली पोलिसांनी अटक केलेल्या पूजा नाईक हिला न्यायालयाने पाच दिवसांची पोलिस कोठडी बजावली आहे. तथापि, या आदेशाला आव्हान देण्यात येणार आहे, असे पूजाच्या वकिलांनी सांगितले. ‘शिपाई’ पदाच्या नोकरी देण्याचे आमिष दाखवून पूजाने २ लाखांना गंडा घातला, अशी तक्रार डिचोली पोलिसांत केली आहे.