Mapusa Water Shortage: राज्यभर धो-धो ओतणारा पाऊस, तरीही म्हापशात नळ कोरडेच...

Water Shortage in Mapusa: राज्यात मुसळधार पाऊस सुरू झाला असून आता नद्या-नाले आणि धरणे तुडुंब भरली आहेत. असे असताना म्हापशात मात्र वेगळेच चित्र पाहायला मिळत आहे. दोन दिवसांपासून म्हापसा आणि बार्देशमध्ये पाणीच नसल्याने म्हापसेकरांनी नाराजी व्यक्त केली आहे.

माहितीनुसार, दोन दिवस म्हापशात नळ कोरडेच असल्याचे सांगण्यात येत आहे. यामुळे सर्वच कामांचा खोळंबा झाल्याने नागरिकांमधून नाराजीचा सूर उमटत आहे. याप्रकरणी म्हापसा पालिकेचे ॲड. शशांक नार्वेकर यांनी पाणीपुरवठा विभागाच्या अभियंत्याशी चर्चा केली.

त्यांनी दिलेल्या माहितीनुसार, पावसामुळे पाणी गढूळ बनले असून अस्नोडा जलशुद्धीकरण प्रक्रिया केंद्रात पाणी फिल्टर करण्यासाठी विलंब होत आहे. यामुळे हा पुरवठा होत नसल्याचे सांगण्यात येत आहे.

यासंदर्भात आमदारांनाही कळवले असल्याचे नार्वेकर यांनी सांगितले. बहुधा आज पाणीपुरवठा पुन्हा सुरू होण्याची शक्यता असल्याचे त्यांनी नमूद केले.