Khandepar Bridge : खांडेपार पुलावरील जोडरस्ता अखेर खुला

खांडेपार पुलाच्या जोडरस्त्याचे अखेर आज (रविवारी) लोकार्पण करण्यात आले. यावेळी कृषिमंत्री रवी नाईक, नगराध्यक्ष, नगरसेवक, तसेच कुर्टी - खांडेपार पंचायतीचे सरपंच, उपसरपंच, पंच सदस्य, सार्वजनिक बांधकाम खात्याच्या रस्ते विभागाचे अभियंते व ग्रामस्थ उपस्थित होते.

खांडेपार पुलाच्या या जोडरस्त्याचे काम पूर्ण झाल्यानंतर आता हा रस्ता खुला केल्यामुळे वाहनचालकांनी समाधान व्यक्त केले आहे. गेला बराच काळ हे उद्‍घाटन रेंगाळले होते. खांडेपारच्या नवीन पुलाचे बांधकाम केल्यानंतर खांडेपार भागाकडील जोडरस्त्याचे काम अडून राहिले होते.

या ठिकाणी असलेल्या एका पुरातन घराचा वाद न्यायप्रविष्ट झाल्यामुळे हे काम अडून राहिले होते. त्यानंतर न्यायालयातून हा तिढा सोडवल्यानंतर या जोड रस्त्याचे काम सुरू करण्यात आले होते.