Gauresh Kerkar Arrested: अखेर सराईत चोरटा गौरीश केरकर गजाआड; पळून जाण्याच्या तयारीत असताना पोलिसांची कारवाई!

राज्यात चोरीच्या घटना थांबायचं नाव घेत नाहीयेत. सातत्याने चोरीच्या घटना समोर येतायेत. पोलिसांचा वचक कमी होत चालला आहे का? असा प्रश्न विचारला जाऊ लागला आहे. पोलिसांना आव्हान देऊन चोरटे आपला डाव साधत आहे. दोनच दिवसांपूर्वी डिचोलीत दिवसाढळ्या चोरट्यांनी मोठा डल्ला मारला होता.

मात्र आता, मागील काही दिवसांपासून फरार असणाऱ्या गौरीश केरकर या सराईत चोरट्याच्या मुसक्या आवळण्यात पोलिसांना यश आले आहे. पणजीत झालेल्या चोरीप्रकरणी पोलिस गेल्या काही दिवसांपासून त्याचा शोध घेत होते. मात्र अखेर त्याला अटक करण्यात आली. तोरडा खाडीजवळून पळून जाण्याच्या तयारीत असताना पोलिसांनी त्याच्या मुसक्या आवळल्या. त्याच्यावर चोरी, दरोडा यांसारखे अनेक गुन्हे दाखल आहेत.

मिळालेल्या माहितीनुसार, तोरडा खाडीजवळून गौरीश हा पळून जाण्याच्या तयारीत होता. यासंबंधी माहिती मिळताच पर्वरी पोलिसांनी तात्काळ घटनास्थळी पोहोचून त्याला अटक केली. अनेक चोरीच्या गुन्ह्यात तो वॉंटेड होता. गेल्या महिन्याभरापासून तो लपून बसला होता. काही दिवसांपूर्वी पणजीत झालेल्या चोरीप्रकरणी पोलिस त्याच्या शोधात होते. तेव्हापासून तो फरार होता.

शुक्रवारी (9 ऑगस्ट) सायंकाळी उशिरा पोलिस अधिकारी राहुल परब यांना गौरीश केरकर तोरडा खाडीजवळ असल्याची माहिती मिळाली. याच माहितीच्या आधारे परब यांच्या नेतृत्वाखाली पोलिसांची टीम घटनास्थळी पोहोचली. याचदरम्यान, पोलिसांना पाहताच त्याने पळून जाण्याचा प्रयत्न केला. मात्र पोलिसांनी त्याचा पाठलाग करुन त्याच्या मुसक्या आवळल्या. आता पुढील तपास करण्यात येत आहे.

दुसरीकडे, काही दिवसांपूर्वी दुचाकी वाहन चोरी केल्याप्रकरणी मुरगाव पोलिसांनी एकाला अटक केली होती. या प्रकरणातील अटक करण्यात आलेल्या संशयिताला पुन्हा एकदा वाहन चोरीप्रकरणी अटक करण्यात आली. या कारवाईत दोन दुचाकी वाहने पोलिसांनी जप्त केली.

मुरगाव पोलिस स्थानकांचे निरीक्षक राघोबा कामत यांनी दिलेल्या माहितीनुसार, वेर्णा व वास्को हद्दीत दुचाकी वाहन चोरी झाल्याची तक्रार वेर्णा व वास्को पोलिस स्थानकांत नोंद झाली होती. या तक्रारीच्या आधारे पोलिसांनी शोधमोहीम राबवली व संशयितास अटक केली. या प्रकरणी वास्को एलमॉत थियटर परिसरातील विनायक वसंत राणे या संशयितास अटक करण्यात आली. सदर संशयीत आरोपी विनायक राणे याला घरफोडी, वाहन चोरी प्रकरणी अनेक वेळा पोलिसांनी अटक केली.