...तर आगामी अधिवेशनावर बहिष्कार; युरी म्हणतात म्हादई, बेरोजगारीवरुन सरकारला उघडे पाडणार

Goa Budget Session 2024: सत्ताधारी आणि विरोधकांमध्ये प्रश्नांचे समान वाटप करण्याची लॉट पद्धत बंद केलीय. याबाबत सभापतींची भेट घेणार असून हा प्रकार थांबला नाही तर आगामी विधानसभेच्या अधिवेशनावर बहिष्कार टाकू, असा इशारा विरोधी पक्षनेते युरी आलेमाव यांनी दिला आहे.

सातही विरोधी आमदारांच्या वतीने घेण्यात आलेल्या पत्रकार परिषदेत आलेमाव बोलत होते.

भाजप सरकारने विधानसभा अधिवेशनाचा कालावधी कमी केला, त्यांनी उप प्रश्न देखील कमी केले आहेत. आता तर सत्ताधारी आणि विरोधकांमध्ये प्रश्नांचे समान वाटप करण्याची लॉट पद्धत बंद केल्याचे आलेमाव यांनी नमूद केले.

तसेच, आगामी अर्थसंकल्पीय अधिवेशनात विरोधी आमदार संघटितपणे सरकारला घेरून, म्हादई, बेरोजगारी, आपत्कालीन यंत्रणा यासारख्या विषयांवरून सरकारला उघडे पाडणार असल्याचे आलेमाव म्हणाले.

अर्बन नक्षलवाद्यांमुळे राज्यातील सामाजिक सलोखा नष्ट होऊ शकतो. त्यामुळे मुख्यमंत्री डॉ. प्रमोद सावंत यांनी अर्बन नक्षलवाद्यांची नावे जाहीर करून त्यांच्यावर कारवाई करावी अशी मागणीही सातही आमदारांनी केली.

गोवा फॉरवर्ड पक्षाचे विजय सरदेसाई यांनी त्यांचा पक्ष आगामी लोकसभा निवडणूक लढणार नसल्याचे स्पष्ट केले आहे. तसेच, इंडिया आघाडीत सहभागी व्हायचे का नाही याबाबत आपल्याशी आघाडीतील नेत्यांनी संपर्क साधलेला नाही त्यामुळे याबाबत अद्याप निर्णय घेतलेला नाही, असे सरदेसाई यांनी यावेळी स्पष्ट केले आहे.

दरम्यान, येत्या 2 फेब्रुवारीपासून विधानसभेचे अर्थसंकल्पीय अधिवेशन बोलावण्यात आले आहे. 6 दिवसीय अधिवेशन 9 फेब्रुवारीला समाप्त होणार आहे.