राज्यात गेल्या अनेक दिवसांपासून मुसळधार पावसाने थैमान घातले असून, त्याचे परिणाम विविध भागांमध्ये दिसून येत आहेत. आज कुर्टी-फोंडा परिसरात चिंचेचे झाड तीन वाहनांवर कोसळल्याचं समोर आलं आहे. तिन्ही वाहनांचं मोठ्या प्रमाणात नुकसान झालं आहे.

सुदैवाने या घटनेत कोणतीही जीवितहानी झाली नाही. झाड कोसळताच स्थानिक नागरिकांनी तात्काळ घटनास्थळी धाव घेतली. अग्निशमन दल घटनास्थळी दाखल झाले असून, झाड हटवण्याचे काम सुरू आहे.

या भागात गेल्या काही दिवसांपासून जोरदार पाऊस सुरू आहे. त्यामुळे झाडांची मुळे सैल होण्याची शक्यता व्यक्त केली जात आहे. प्रशासनाने नागरिकांना सतर्क राहण्याचे आणि जुन्या, मोठ्या झाडांपासून अंतर ठेवण्याचे आवाहन केले आहे.