राज्यात सध्या मंत्रिमंडळ फेरबदलाच्या चर्चांना उधाण आले आहे. मुख्यमंत्री डॉ. प्रमोद सावंत यांनी नुकतीच केंद्रीय गृहमंत्री आणि भाजपचे वरिष्ठ नेते अमित शाह यांची भेट घेतली. त्यानंतर राज्याच्या राजकारणात पुन्हा एकदा मंत्रिमंडळ फेरबदलाच्या चर्चांना हवा मिळाली. यावर आता, राज्याचे माजी मुख्यमंत्री आणि आमदार दिगंबर कामत यांची प्रतिक्रियाही समोर आली आहे. कामत म्हणाले की, 'मी मागचाही विचार करत नाही आणि पुढचाही विचार करत नाही, मी जिथे आहे तिथेच आहे.' त्यांच्या या वक्तव्याने अनेक सूचक राजकीय इशारे दिले आहेत. मागील काही दिवसांपासून राज्याच्या राजकीय वर्तुळात कामतांच्या गळ्यात मंत्रिपदाची माळ पडणार असल्याचे बोलले जात आहे. दोन दिवसांपूर्वी, मंत्रिमंडळ फेरबदलाच्या प्रश्नावर बोलताना विधानसभा अध्यक्ष रमेश तवडकर यांनीही त्यांच्या नावाचा उल्लेख केला होता.