सासष्टी: उच्च न्यायालयाने दिलेल्या आदेशानुसार गुरुवारी (ता.२४) दवर्ली पंचायतीतर्फे पंचायत क्षेत्रातील रस्त्याच्या बाजूला असलेल्या बेकायदेशीर बांधकाम व दुकानांची तपासणी करण्यात आली. दहा दिवसांपूर्वी १७५ जणांना नोटीस पाठवली होती. त्यानुसार कुणी आदेश पाळला हे पाहण्यासाठी व काहीजणांना नोटीस देण्यासाठी आम्ही पंचायत क्षेत्रात फिरत आहोत, असे सरपंच श्याम राजाध्यक्ष यांनी सांगितले.

आपल्याबरोबर उपसरपंच विद्याधर आर्लेकर, पंच हेर्कुलान नियासो, कार्मिनो कार्व्हालो, मिशेल मिरांडा तसेच सचिव सायमन फिरत आहेत. आजपासून प्रत्येक दिवशी १० ते १५ अशा आस्थापनांना भेटी देऊन तपासणी केली जाईल व ही प्रक्रिया पूर्ण केली जाईल. आम्ही पंचायत क्षेत्रातील बेकायदेशीर कामे बंद करण्याचा निर्धार केल्याचे सरपंचांनी सांगितले.

या पाहणीचा अहवाल तयार करून तो परत एकदा पंचायतीच्या बैठकीत चर्चेसाठी ठेवला जाईल. ज्या कोणी आदेशाचे पालन केले नाही त्यांना कारणे दाखवा नोटीस पाठवली जाईल व नंतर ही बांधकामे तसेच दुकाने पाडली जातील. काही सरकारी जागांवर वाहने पार्क करून ज्यांचा व्यापार सुरू आहे, तेही आम्ही बंद करून सरकारी जागा मोकळी करणार आहोत. त्याचप्रमाणे जे मासळी विक्रेते आहेत त्यांना नोटीस पाठवली आहे व आरोग्य खात्याकडून आरोग्याच्या दृष्टीने काळजी घेण्याचे पत्र आल्याचे सरपंचांनी सांगितले.