महाराष्ट्र नवनिर्माण सेना प्रमुख राज ठाकरे यांनी अयोध्या दौऱ्यावर येण्याआधी उत्तर भारतीयांची माफी मागावी, अशी मागणी उत्तर प्रदेशमधील भाजपाचे खासदार ब्रिजभूषण सिंह यांनी केली आहे. तसे न केल्यास ठाकरेंना उत्तर प्रदेशात घुसून देणार नाही, असा इशारा देखील त्यांनी दिला आहे.

याबाबत बोलताना ब्रिजभूषण सिंह म्हणाले, "महाराष्ट्रात छत्रपती शिवाजी महाराजा, शाहू महाराजांसारखे लोक जन्मले, मात्र त्याच भूमीवर उत्तर भारतीयांना शिवीगाळ मारहाण करणारे राज ठाकरे देखील जन्मले."

ब्रिजभूषण सिंह पुढे म्हणाले, “महाराष्ट्रात राज ठाकरे अजानचा विरोध करू, अथवा हनुमान चालिसाचं पठण करो मला त्याच्याशी घेणंदेणं नाही. माझी भूमिका पक्षाची भूमिका नाही, माझी व्यक्तिगत भूमिका आहे. श्रीराम देखील उत्तर भारतीय होते. त्यांच्या वंशजांचा अपमान करणाऱ्या व्यक्तीला माफी मागाविच लागेल."

राज ठाकरे यांनी अयोध्या दौऱ्यावर जाण्याचे जाहीर केल्यानंतर ब्रिजभूषण सिंह यांनी आपली भूमिका स्पष्ट केली. यावर ठाकरे आता काय प्रतिक्रिया देतात याकडे सर्वांचे लक्ष लागले आहे.