Ram Mandir Ayodhya: अयोध्येत राम मंदिरातील प्राणप्रतिष्ठा सोहळा 22 जानेवारीला पार पडणार आहे. देशभरात भाविकांमध्ये आनंदाचे आणि उत्साहाचे वातावरण आहे. नव वर्षातील हा जानेवारी महिना ऐतिहासिक ठरणार आहे. अलीकडेच (19 जानेवारीला) काळ्या पाषाणातील, चेहऱ्यावर गोड हास्य, भाळी टिळा लावलेल्या श्री रामाच्या अत्यंत सुंदर मुर्तीचा फोटो समोर आला आहे. मात्र धार्मिक मान्यतेनुसार मूर्तीची प्राणप्रतिष्ठा केल्याशिवाय पुजा अपुर्ण मानली जाते. प्राणप्रतिष्ठा म्हणजे काय ती कशी केली जाते हे जाणून घेऊया.

• प्राणप्रतिष्ठा या शब्दाचा अर्थ काय ?

हिंदु धर्मात मुर्तीची प्राणप्रतिष्ठेला खुप महत्व आहे. कोणत्याही मुर्तीची स्थापना करण्यापुर्वी प्राणप्रतिष्ठापना करणे गरजेचे असते. प्राणप्रतिष्ठा म्हणजे मुर्तींत जीव प्रस्थापित करणे. प्राण म्हणजे शक्ती आणि प्रतिष्ठा म्हणजे स्थापना. वेद आणि पुराणात सांगण्यात आलेल्या विधीनुसार प्राणप्रतिष्ठा केली जाते.

• प्राणप्रतिष्ठा विधी कशी केली जाते?

कोणत्याही मूर्तीची प्राणप्रतिष्ठा करण्यापुर्वी मूर्तीला गंगेच्या पाण्याने स्नान केले जाते.

यानंतर मूर्ती व्यवस्थित स्वच्छ केली जाते.

मूर्तीला नवे आणि स्वच्छ कपडे परिधान केले जाते.

नंतर मूर्तीला स्वच्छ जागी ठेऊन चंदन लावले जाते.

यानंतर मंत्रांचे पठन केले जाते.

यानंतर प्राणप्रतिष्ठेच्या अनुष्ठानाची प्रक्रिया केली जाते.

यावेळी विधिवत पंचोपचाराने पुजा करण्यात येते.

नंतर आरती करून भाविकांमध्ये प्रसाद वाटला जातो.

• प्राणप्रतिष्ठा करणे का गरजेचे असते?

धार्मिक मान्यतेनुसार प्राणप्रतिष्ठा केल्याशिवाय मूर्तीची पुजा करणे शुभ मानले जात नाही. प्राणप्रतिष्ठा केल्याने मुर्तीत प्राण आणले जाते. यानंतरच मुर्तीची पुजा करणे शुभ मानले जाते. प्राणप्रतिष्ठा करून मुर्तीत देव विराजमान होतात अशी भाविकांची धारणा आहे. प्राणप्रतिष्ठा शुभ मुहुर्तावर आणि योग्य तिथीवर करणे गरजेचे असते. अयोध्येत प्रभू श्री रामाचे प्राणप्रतिष्ठा 22 जानेवारीला 12:15 ते 12:45 या वेळेत होणार आहे.