मडगाव : पैशासाठी आपल्या सहकारी कामगाराचा खून करून पळून जाण्याच्या प्रयत्नात काणकोण पोलिसांनी रेल्वे स्थानकावर एका नेपाळी नागरिकाला अटक केली होती. निमा तमंग या नेपाळी आरोपीला दक्षिण गोव्याचे अतिरिक्त सत्र न्यायाधीश व्हिन्सेंट डिसिल्वा यांनी खुनाच्या आरोपाखाली दोषी ठरविले असून आज 30 जुलै रोजी त्याला शिक्षा ठोठावण्यात येणार आहे.

दोन वर्षांपूर्वी पाळोळे येथे हा खून झाला होता. एका शॅकवर वेटर म्हणून काम करणाऱ्या रणजित हिरासिंग (वय 27) याच्या डोक्यावर लाकडाच्या दांड्याने वार करून आरोपी त्याच्याकडे असलेले पैसे घेऊन पळून जाण्याच्या प्रयत्नात असताना पोलिसांनी त्याला काणकोण रेल्वे स्थानकावर अटक केली होती.

या हल्ल्यात जखमी झालेल्या वेटरला उपचारासाठी इस्पितळात नेले असता तिथे त्याला मृत जाहीर करण्यात आले होते. या प्रकरणी काणकोणचे तत्कालीन पोलिस निरीक्षक राजेंद्र प्रभुदेसाई यांनी तपास केला होता. आज शनिवारी 30 जुलै रोजी न्या. डिसिल्वा आरोपीचे म्हणणे ऐकून घेऊन नंतर त्याला शिक्षा ठोठावणार आहेत.