पणजी,

म्हार्दोळ येथील सार्वजनिक श्री गणेशोत्सव विश्वस्त मंडळातर्फे साजरा होणारा यंदाचा ‘गणेशोत्सव २०२०’ कोविड १९ च्या महामारीमुळे प्रतिकारात्मकरीत्या अत्यंत साधेपणाने साजरा करण्याचा महत्त्वाचा निर्णय येथे घेण्यात आलेल्या मंडळाच्या कार्यकारी समितीच्या बैठकीत एकमताने घेण्यात आला.
बैठकीच्या अध्यक्षस्थानी मंडळाचे अध्यक्ष डॉ. दत्ता भट तसेच मंडळाचे इतर सभासद उदय म्हार्दोळकर - सचिव. उल्हास बागकर - खजिनदार. शेखर मडकईकर - उपाध्यक्ष. रामचंद्र नाईक - उपसचिव. सौ. छाया गावडे, सौ. संजिता पेडणेकर, नितीन म्हार्दोळकर, दत्तगुरु कुंकळ्येकर, शेखर नाईक, सुधीर नाईक, चंद्रशेखर नाईक, विवेक नाईक, अजित नाईक, गोविंद म्हार्दोळकर हे उपस्थित होते.
मंडळाच्या कार्यकारी समितीने मंजूर केलेल्या ठरावानुसार यंदाचा गणेशोत्सव दीड दिवसाचा असेल, तसेच हा उत्सव कार्यकारी मंडळातर्फे सामाजिक अंतर राखून साजरा करण्यात येईल. श्रींची पूजा - अर्चा, आरती, नैवेद्य आदी धार्मिक विधी ब्राह्मणांकरवी करून घेतले जातील. दुसऱ्या दिवशी संध्या. ५.३० वा. विसर्जन करण्यात येईल.