Canacona Illegal Liquor Transport

निवडणूक काळात मद्यतस्करीसंदर्भात चेकनाक्यांवर वाहनांची कडक तपासणी सुरू असल्याने जलमार्गान मद्यतस्करीचा मार्ग काही दलालांनी स्वीकारला होता.

काणकोण येथील समुद्रीमार्गे कर्नाटकमध्ये मोटार होडीतून तस्करी करणाऱ्या पोळे येथील राजू नाईक याला काणकोण पोलिसांनी अटक केली. बोटीतून सुमारे 1.85 लाखांची दारू जप्त केली असून पुढील तपास सुरू आहे.

सध्या चेकनाक्यावर कसून तपासणी होत असल्याने दारूची तस्करी जलमार्गाने होत असल्याची माहिती काणकोण पोलिसांना मिळाली होती. त्यानुसार मंगळवारी सायंकाळपासून पोलिसांनी पाळोळे समुद्रकिनाऱ्यावर साध्या वेशात गस्त ठेवली होती.

मंगळवारी रात्री एक मोटार होडी समुद्रकिनारी दृष्टीस पडली. त्यामध्ये एक व्यक्ती होती. या होडीची झडती घेतली असता मद्याच्या बाटल्या आढळून आल्या. ही मद्यतस्करी कर्नाटकात करण्यात येणार असल्याचे चौकशीत समोर आले आहे.

संशयित राजू नाईक याला अटक करून जामिनावर त्याची सुटका झाली. संशयित हा पोलिस खात्यातील एका उपनिरीक्षकाचा नातेवाईक असल्याने या मद्यतस्करीमागे त्याचा हात असल्याची चर्चा स्थानिकांत सुरू आहे.