पणजी, 

टाळेबंदीच्या काळात मार्गदर्शक सूचनांमध्ये शिथिलता करून राज्य सरकारने घाऊक व किरकोळ मद्य विक्रेत्यांना संध्याकाळी ६ वाजेपर्यंत दुकाने खुली ठेवण्यास परवानगी दिली होती. या परवानगीमुळे आता ही दुकाने रात्री ८ वाजेपर्यंत खुली राहणार आहेत. यासंदर्भातची माहिती अबकारी आयुक्त अमित सतिजा यांनी दिली.
घाऊक व किरकोळ मद्य विक्रेत्यांना सीलबंद मद्याच्या बाटल्या संध्याकाळी ६ वाजेपर्यंत विक्री करण्यास परवानगी देण्यात आली होती मात्र त्यांचा हा व्यवसाय संध्याकाळच्या वेळेसच अधिक होतो त्यामुळे किमान ८ वाजेपर्यंत ती खुली ठेवण्यास परवानगी द्यावी अशी विनंती या व्यवसायातील काही मालकांनी केली होती. या व्यवसायातून अबकारी खात्यालाही मोठ्या प्रमाणात महसूल मिळत असतो त्यामुळे खात्याने हा निर्णय घेतला.