पणजी

केपे नगरपालिका क्षेत्रात घरोघरी जाऊन घरपट्टी गोळा करण्यासाठीच्या योजनेचा आज उपमुख्यमंत्री चंद्रकांत ऊर्फ बाबू कवळेकर यांच्या हस्ते सुरवात करण्यात आली. ही घरपट्टी गोळा करण्यासाठी राज्य शहरी विकास प्राधिकरण व एक्सीस बँकेतर्फे अद्यावत पॉईंट ऑफ सेल मशीनचा वापर करण्यात येणार आहे. 
टाळेबंदीच्या काळात घरभाडे गोळा करण्यासाठी नगरपालिकेत लोकांनी गर्दी करू नये यासाठी या अभिनव योजनेचा अवलंब करण्यात येणार असल्याचे कवळेकर यांनी यावेळी सांगितले. घरपट्टी भरण्यासाठी यामुळे जनतेला सहजता होणार आहे. तसेच नगरपालिकेची आर्थिक परिस्थिती सुधारण्यात ह्यामुळे मदत होणार आहे, असेही ते म्हणाले. यावेळी राज्यसभा खासदार विनय तेंडुलकर, केपेचे नगराध्यक्ष दयेश नाईक, नगरसेवक व राज्य शहरी विकास प्राधिकरणाचे अधिकारी हुसेन मुजावर, एक्सीस बँकेचे अधिकारी, आदी उपस्थित होते.