Subhash Shirodkar on Amit Shah: केंद्रीय गृहमंत्री आणि भाजपचे वरीष्ठ नेते अमित शाह हे गोव्यात येत असल्याच्या पार्श्वभूमीवर भाजपची म्हादई पाणी वाटप संदर्भातील भूमिका काय असा प्रश्न सध्या गोव्यात उपस्थित झालेला असताना जलस्त्रोत मंत्री आणि म्हादई संदर्भातील विधानसभा समितीचे अध्यक्ष सुभाष शिरोडकर यांनी, शहा हे राष्ट्रीय नेते असून ते गोव्याच्या हितार्थच निर्णय घेतील अशी सारवासारव त्यांनी केली.

दरम्यान, शिरोडकर आज फातोर्डा येथे एका जल संसाधन योजनेच्या शुभारंभास आले होते. त्यावेळी त्यांना हा प्रश्र्न विचारला असता, त्यांनी वरील उत्तर दिले. म्हादई प्रश्न काय याची शहा यांना माहिती आहे. ते या प्रश्नांवर योग्य तो तोडगा काढतील असे शिरोडकर यांनी सांगितले.

या मुद्द्यावर उद्या तुम्ही शहा यांच्याकडे बोलणार का असे त्यांना विचारले असता, नक्कीच असे उत्तर त्यांनी दिले. यापूर्वीही आम्ही यासंबंधी त्यांच्याकडे बोललो आहोत. उद्याही बोलू असे त्यांनी सांगितले.

शुक्रवारी बोलताना शिरोडकर यांनी गृहमंत्री शाह म्हादईबाबत काय बोलतात पाहू, त्यानंतर पुढचे पुढे पाहू. ते आपले पाहुणे आहेत, त्यांचे आदरातिथ्य करणे गरजेचे आहे, असे वक्तव्य केले होते.