पणजी: गोवा कोकणी अकादमीने २०२५-२०२६ या आर्थिक वर्षासाठी विविध योजना जाहीर करून लेखक, प्रकाशक, विद्यार्थी आणि सांस्कृतिक संस्थांकडून अर्ज मागवले आहेत. सुरुवातीला अर्ज करण्याची अंतिम तारीख २६ ऑगस्ट होती. मात्र ती मुदत वाढवून आता १२ सप्टेंबरपर्यंत करण्यात आली आहे.

अकादमीच्या योजनांमध्ये चंवर योजना (पहिल्या पुस्तकासाठी ७५% आर्थिक मदत), साहित्य प्रभा योजना (७०%), बालसाहित्य प्रकाशन (७०%), कोकणी नाटक-मांड (७५%), लोकवेद पुस्तक प्रकाशन (७०%), शैक्षणिक साहित्य प्रकाशन (७०%), तसेच अनुवादित व लिप्यंतरित साहित्य प्रकाशन यांसारख्या योजना समाविष्ट आहेत.

याशिवाय क्लॅरिसा वाझ ई मोरेनास संशोधन शिष्यवृत्ती, संगीत साहित्य प्रकाशन, दुर्मिळ साहित्य पुनर्प्रकाशन अशा विशेष योजनाही जाहीर करण्यात आल्या आहेत.

शैक्षणिक, बालसाहित्य, लोकसाहित्य, अनुवाद आणि संगीत या विषयांवरील कार्यशाळा/शिबिरांना आर्थिक सहाय्य, कोकणी शैक्षणिक शिष्यवृत्ती (बी.ए./एम.ए./पीएच.डी.), संगीत कार्यक्रम निर्मिती आणि लोकवेद संशोधन प्रकल्पांसाठीही अर्ज मागविण्यात आले आहेत.

अर्जाचे नमुने गोवा कोकणी अकादमीच्या कार्यालयात, गोवा संचार भवन, बीएसएनएल इमारत, ५वा मजला, पाटो, पणजी येथे उपलब्ध आहेत, असे अकादमीने कळविले आहे.