पणजी : जोडपे विभक्त झाल्यानंतर महत्वाचा मुद्दा असतो त्यांच्या मुलांचा. नवरा बायको जरी एकमेकांपासून वेगळे झाले तरी त्यांच्या मुलांवर दोघांचाही तितकाच अधिकार असतो. मात्र गोव्यातील एका महिलेने आपल्या विभक्त झालेल्या पतीला मुलाला भेटण्यापासून विरोध केला आहे.

तिच्या म्हणण्यानुसार, तिच्या पतीमुळे मुलाला मानसिक त्रास होऊन मुलाची चिडचिड होते. त्यामुळे तिने पतीच्या भेटीचे अधिकार रद्द करण्याची मागणी करणारा अर्ज न्यायालयात सादर केला. यावेळी वडिलांच्या भेटीचा हक्क केवळ मुलाची चिडचिड झाल्यामुळे रद्द करता येणार नाही, असे न्यायालयाने म्हटले आहे.

(Goa court order regarding children after separation of couple)

“वडिलांचे भेटीचे अधिकार केवळ या कारणावरून रद्द करणे शक्य नाही कारण पतीचाही मुलावर तितकाच अधिकार आहे. मुलाला वडिलांसोबत एकत्र राहण्यासाठी वेळ मिळाला नाही यामुळे ही भावना मुलामध्ये येऊ शकते असे, न्यायिक दंडाधिकारी प्रथम श्रेणी, 'एफ' न्यायालय, म्हापसा, टेसी मास्करेन्हास यांनी सांगितले.

"अशा प्रकारे, पती-पत्नीला कोणत्याही त्रयस्थ व्यक्तीने सहाय्य केले तर ते योग्य होईल जे त्यांना मुलाशी चांगले संबंध प्रस्थापित करण्यास मदत करेल जेणेकरून मूल दोन्ही पालकांशी योग्य प्रतिसाद देईल, असे न्यायालयाने म्हटले.

पक्षकारांना पणजी येथील मध्यस्थी केंद्रासमोर हजर राहण्याचे निर्देश दिले, ज्यात “एक प्रशिक्षित मध्यस्थ पक्षकारांना मुलाशी प्रभावी भेट घडवून आणण्यास मदत करेल जेथे मुलाला वडिलांसोबत वेळ घालवता येईल”.

वडिलांना गेल्या वर्षी 23 डिसेंबर रोजी भेटीचे अधिकार देण्यात आले होते, दरम्यान आईच्या उपस्थितीत दर रविवारी सकाळी 10 ते दुपारी 12 च्या दरम्यान अल्पवयीन मुलाला भेटण्याची परवानगी देण्यात आली होती. प्रतिवादीला भेटीचे अधिकार देण्यात आले कारण मूल लहान वयाचे आहे आणि त्याला दोन्ही पालकांचे प्रेम आणि आपुलकी आवश्यक आहे,असे न्यायालयाने यावेळी म्हटले आहे.