Mayem Biodiversity मये गावातील समग्र इतिहास दर्शविणारा ‘जैवविविधता नकाशा’ तयार करण्यात आला असून या नकाशाचे आज म्हणजेच दि. 16 ऑगस्ट रोजी मुख्यमंत्री डॉ. प्रमोद सावंत यांच्या हस्ते अनावरण करण्यात आले. या नकाशाद्वारे इसवी सन तेराशेपासूनचा मये गावचा सामाजिक, सांस्कृतिक, धार्मिक आदी वारसा माहिती स्वरूपात सर्वांसमोर येणार आहे.

आज या आगळ्यावेगळ्या उपक्रमाचे अनावरण मुख्यमंत्र्याच्या हस्ते करण्यात आले असून या विविधतेचे जतन, संरक्षण करण्यात मयेच्या जुन्या पिढीचा मोलाचा वाटा आहे. 12 व्या शतकापासूनचा इतिहास जतन करणारं मये हे देशातील पहिले गाव असून ही परंपरा आता येथील तरुणपिढी पुढे नेणार असल्याचे सावंत याप्रसंगी म्हणाले.

या कार्यक्रमासंबंधी शनिवारी सायंकाळी डिचोलीत घेतलेल्या या पत्रकार परिषदेवेळी मये-वायंगिणीच्या सरपंच सौ. सुवर्णा चोडणकर, उपसरपंच सुफला चोपडेकर, पंच सदस्य वर्षा गडेकर, विद्याधर कारबोटकर तसेच गोशाळेचे अध्यक्ष कमलाकांत यांनी माहिती दिली होती

इसवी सन तेराशेपासूनचा मये गावचा सामाजिक, सांस्कृतिक, धार्मिक आदी वारसा याबद्दल माहिती संकलित करून ती या नकाशात समाविष्ट करण्यात आली असून सोबतच जैवविविधता संपत्तीचाही अंतर्भाव या नकाशात करण्यात आला आहे.