मडगाव, पणजी, :

कोरोनाची लागण झालेली कुडतरी येथील ७५ वर्षीय ज्येष्ठ महिलेचे शुक्रवारी कोविड इस्पितळात निधन झाले. ‘कोविड’च्या त्या गोव्यातील पाचव्या बळी ठरल्या आहेत. त्यांच्या अंत्यविधीची तयारी करण्यात आली असून त्यांच्यावर ४ जुलै रोजी कुडतरी चर्चच्या दफनभूमीत सन्मानाने अंत्यसंस्कार करण्यात येतील, अशी माहिती कुडतरीचे आमदार रेजिनाल्ड लॉरेन्स यांनी दिली.
कुडतरीत ३१ जणांना कोरोनाची लागण झाली होती. त्यामुळे कुडतरीतील दोन प्रभाग कंटेन्मेंट झोन म्हणून घोषित केले आहेत. कुडतरीतील बहुतांश कोरोना रुग्ण बरे झाले असून त्यांना त्यांच्या घरी विलगीकरणात ठेवण्यात आले आहे. ‘त्‍या’ ज्‍येष्‍ठ महिलेला १८ जून रोजी कोविड इस्पितळात दाखल केले होते. गेल्या तीन दिवसांतील त्या कोरोनाच्या दुसरा बळी ठरल्या आहेत. बुधवारी रात्री ताळगाव येथील ज्येष्ठ नागरिकाचा मृत्यू झाला होता. सासष्टीत कोरोनाचा हा दुसरा बळी असून काही दिवसांपूर्वी चांद्रवाडा - फातोर्डा येथील ज्येष्ठ महिलेचा मृत्यू झाला होता. ‘त्‍या’ महिलेच्‍या कुटुंबातील इतर सदस्यांनाही कोरोनाची लागण झाली होती. तथापि, त्यांची प्रकृती सुधारली असून त्यांचा कोरोना चाचणीचा अहवाल निगेटिव्ह आल्याने त्यांना घरी विलगीकरणात ठेवण्यात आले आहे.