Traffic Police at Gaundalim: राज्यातील वाढते अपघात पाहता सरकार आणि वाहतूक पोलीस अधिकच सतर्क झाले आहे. यासंदर्भात राज्यभरात पोलीस ठिकठिकाणी वाहतूक मोहीम राबवत आहेत. दरम्यान आज जुने गोवा येथे सुरळीत वाहतुकीसाठी पोलिसांची नेमणूक करण्यात आली आहे.

काही दिवसांपूर्वी, मुख्यमंत्र्यांच्या 'हेलो गोयंकार' या कार्यक्रमात शिवानंद शेटये या गृहस्थांनी गवंडाळी रस्त्यावरील वाहतूक रहदारीला शिस्त नसल्याचे नमूद केले होते. या परिसरात वाहतूक सुरळीत व्हावी यासाठी त्यांनी तिथे वाहतूक पोलीस नेमण्याची मागणी मुख्यमंत्र्यांकडे केली होती.

या पार्श्वभूमीवर आज या परिसरात वाहतूक पोलिसांची नेमणूक करण्यात आली आहे. दरम्यान, गवंडाळी रेल्वे क्रॉसिंगजवळ पोलिसांनी तपासणी केली असता, वाहनचालक नियमांचे पालन करत नसल्याचे पणजी वाहतूक पोलीस निरीक्षक चेतन सुर्लीकर यांच्या निदर्शनास आले.

दरम्यान, नियमांचे पालन न करणाऱ्या वाहनचालकांकडून दंड आकरण्यात येणार असल्याचे पोलीस निरक्षकांनी सांगितले आहे.