म्हापसा : पत्ता विचारण्याचा बहाणा करून दुचाकीवरून आलेल्या दोन अज्ञात चोरट्यांनी खोर्ली- म्हापसा येथील ६५ वर्षीय महिलेच्या गळ्यातील सोनसाखळी हिसकावली. ही घटना  बुधवारी ता. २१ रोजी सकाळी ६.४५ च्या सुमारास घडली.

माधुरी वर्लेकर यांनी म्हापसा पोलिसांत दिलेल्या तक्रारीनुसार, सोनसाखळीची किमत सुमारे एक लाख रुपये आहे. माधुरी वर्लेकर स्वत:च्या घराजवळील रस्त्यावर सकाळी मॉर्निंग वॉकला जात असताना तिथे दोघे अज्ञात इसम दुचाकीवरून आले व त्यांनी पत्ता विचारण्याच्या बहाण्याने वर्लेकरांच्या गळ्यातील सोनसाखळी हिसकावनू नेली. या संशयितांपैकी एकाने हेल्मेट परिधान केले होते, तर त्याच्या दुसऱ्या साथीदाराने स्वत:चा चेहरा मास्कने झाकला होता. या प्रकरणाचा तपास पोलिस उपनिरीक्षक आशिष परब करीत आहेत.