Illegal Water Sports : गोव्यात जलक्रीडा करण्यासाठी अनेक पर्यटक दाखल होत असतात. पण यादरम्यान अनेक अपघातही घडताना आपल्याला दिसून येतात. बऱ्याचदा अति लाभाच्या हव्यासापोटी ते जलक्रीडा करण्यासाठी आलेल्या पर्यटकांचा बोटीमध्ये भडिमार करतात.

पर्यटन विभागाकडून बोट ऑपरेटरना काही नियमावली देण्यात आलेली असते. मात्र याचे पालन होताना दिसत नही. अशीच एक घटना म्हणजे बायणामध्ये असलेल्या बॅट आयलंडवर बोटीच्या क्षमतेपेक्षा जास्त प्रवासी बोटीमध्ये भरले असल्याचा प्रकार उघड झाला असून पोलिसांनी संबंधित बोट ऑपरेटरला ताब्यात घेतले आहे.

एम व्ही श्री रेणुका - 1 या जलक्रीडा बोटीमध्ये क्षमतेपेक्षा जास्त प्रवासी असल्याचे पोलिसांच्या लक्षात आले. त्यामुळे हार्बर पोलिसांनी बोटच्या तिघांवर कारवाई करत गुन्हा नोंद केला आहे.

दरम्यान, मीरामार आणि केरी समुद्रकिनारे पर्यटन विभागाकडून बोट राइड आणि डॉल्फिनस्पॉटिंग ट्रिप या जलक्रीडांसाठी निश्चित करण्यात आलेले आहेत. जेट स्की राईड, फ्लॅटेबल बनाना आणि बंप राइड्स, विंच पॅरासेलिंग, आयलंड ट्रिप, कयाकिंग आणि स्टँड-अप सर्फ बोट्सना केरी समुद्र किनारी परवानगी देण्यात आली आहे.