पणजी : नोव्हेंबर महिन्यात तिसऱ्या दिवशी राज्यात कोरोनाच्या मृत्यूची नोंद झालेली नाही. यापूर्वी राज्यातील कोरोनाच्या बाबतची परिस्थिती सुधारत असल्याचे चित्र पहायला मिळत आहे. १२ नोव्हेंबर आणि १९ नोव्हेंबर रोजीही कोरोना पॉझिटिव्ह रुग्णांचा मृत्यू झाला नव्हता.  गेल्या चोवीस तासात ११६ लोकांना कोरोनाची लागण झाली तर १४७ रुग्ण कोरोनमुक्त झाले आहेत.

राज्यात सध्या एक हजार एकशे चाळीस इतके कोविडचे सक्रिय रुग्ण आहेत. राज्याचा रिकव्हरी रेट ९६.१२ टक्के इतका आहे.  उत्तर आणि दक्षिण गोव्यातील कोविड इस्पितळांमध्ये उपचारासाठी पुरेशी जागा शिल्लक आहे. मिळालेल्या माहितीनुसार, उत्तर गोव्यात खाटांची संख्या २७५ इतकी असून सध्या २०८ खाट वापरासाठी उपलब्ध आहेत तर दक्षिण गोव्यात २३२ इतकी खाटांची संख्या असून सध्या २१९ खाटा उपलब्ध आहेत. आज दिवसभरात ६० लोकांनी गृह अलगीकरणाचा पर्याय स्वीकारला तर २७ लोकांना इस्पितळात उपचारासाठी भरती करण्यात आले आहे.